Seite:Hugo Martina 1856 0652.png

Fertig. Dieser Text wurde zweimal anhand der Quelle korrekturgelesen. Die Schreibweise folgt dem Originaltext.

	Hugo von Langenstein: Martina

10

So menger hande swere

Die nieman kan gezellen

Wir wellen oder enwellen

Uon dem selben vngemach

Dauit der wissage sprach

15

Zegotte mit siner clage

Herre wir sterben alle tage

Dur dich vnd werden ertœtet

Vnd menger swere genœtet

Der verstuont den kvmber wol

20

Dez ich ein teil zellen sol

Swaz wir hie froden han

Div muoz mit bitterkeit zergan

Wir liden hitze vnde frost

Uon armuot vil cranke kost

25

Wir han durst vnd hunger

Der meister zvo dem iunger

Nv regen nv winde

Nv siv gesehen nv blinde

259b,29

Nv sieche nv gesunde

30

Nv heile nv wunde

Nv frolich iung nv truric alt

Nv sumer heiz nv winter kalt

Nv guotes arn nv guotes rich

Nv gar gelich nv vngelich

35

Nv tanzen nv springen

Nv weinen nv singen

Nv leben nv sterben

Nv genesen nv verderben

Nv slafen nv wachen

40

Nv truren nv lachen

Nv nit nv haz nv minne

Nv verlust nv gewinne

Nv leit nv not nv vbernot

Nv clage nv menger hande tot

45

Me danne ich gezellen muge

Daz ir wol wizzint ane luge

Dez mac nieman vber werden

Swer hie lebet ane vf erden

Der tot der ist so sure

50

Ein steter nach gebure

Der vns niht entwichet

Und alle frovde verstrichet

Mit sines bittern endes zagel

Weltlicher süeze ist er ein hagel

Empfohlene Zitierweise:
Hugo von Langenstein: Martina. Hg. von Adelbert von Keller. Stuttgart 1856, Seite 652. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Hugo_Martina_1856_0652.png&oldid=- (Version vom 18.8.2016)