Seite:Hugo Martina 1856 0397.png

	Hugo von Langenstein: Martina

Krefteloser danne ein stovp

157c,57

Von gotte div verfluochit

Und swer din helfe suochit

Der muoz eweclichen sterben

60

An libe an sele verderbin

Geschantes bluotiges tier

Ruore vnde wege dich schier

Von himilrich dv verstozin

Mit andren dinen genozin

65

Uermeinsamet von gottis banne

Grizgrame vnde zanne

Vnd var vz dinem huse

Der verfluchten cluse

Aller luge ein anevanc

70

Alliz mordes vzganc

Aller meintat ein stifte

Aller hofart ein hantgifte

Ein vater aller hovbt sünde

Hovbt man der helle grunde

75

Wernder not ein gast gebe

Aller trunkenheit ein winrebe

Swer dir opfir bringet

Und ane zwivel dinget

Diner helfe der wirt geschant

80

In daz abgründe gesant

Do div maget diz gerette

An der selben stette

Do sprach si ir gebet

Daz si mit zvoversiht tet

157d,85

Aller keiser kvnge herre

Ich mane dich vil verre

Der vf dem hohen trone

Sitzit also schone

Der vnzallichen frovde groz

90

Wan nie wart din genoz

Noch kan och werden niemer

Din gewalt wert iemer

Uon dir alle frovde fliuzit

Din milte hant begiuzit

95

Mit vollekomenem werde

Der himel vnd die erde

Dv hest die himel gevestet

Ane wenken vnd wol gegestet

Din gewalt ist vngeletzet

100

Dv hest die erde gesetzit

Empfohlene Zitierweise:
Hugo von Langenstein: Martina. Hg. von Adelbert von Keller. Stuttgart 1856, Seite 397. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Hugo_Martina_1856_0397.png&oldid=- (Version vom 18.8.2016)