Seite:Hugo Martina 1856 0378.png

	Hugo von Langenstein: Martina

Und ein valschiv cristen

Mit dinen zobirlisten

105

Als wir han befunden

Nv ze mengen stunden

An dinem tumben wane

Dv bist witzen ane

Und ein torschiv schande

110

Daz dv mit zobirs bande

Vns wenest betovben

Und der sinne rovben

150,1

Machen vns zespotte

Mit dinem valschin gote

Den die wisen fliehint

Und sich von im ziehint

5

Wan ez ist ein truge

Und ein offen valschiv luge

Die ir nvwens hant erdaht

Von keiser kvngen versmaht

Ist div selbe tumbe lere

10

Do sprach div maget here

Div hast mich vil gescholten

Ich han gein dir engolten

Keiser daz ich bin ein wip

Und ich han so cranken lip

15

Dv hast gebrochin dinv zvht

Von dem adel vnd der fruht

Bistu keiser geborn

Der vntugende het erkorn

Dem ist alle vnfuoc vmbekant

20

Daz ist der vbil valant

Der guotiv dinc nie geriet

Daz in von himelriche schiet

Dur siner hofart vnfuoc

Div in gar zehohe truoc

25

Dez wart im got erbolgen

Dem wiltu nach volgen

Dem alten lugenere

Mit dinem orden lugemere

150b,29

Wan div valscher lugest

30

Als dv selber bezvgest

So dv von dinen göten seist

Dez dv selber niht enweist

Wie mun daz gote wesin

Wiltu die warheit lesin

35

Die ogen hant ane gesehin

Empfohlene Zitierweise:
Hugo von Langenstein: Martina. Hg. von Adelbert von Keller. Stuttgart 1856, Seite 378. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Hugo_Martina_1856_0378.png&oldid=- (Version vom 18.8.2016)