Seite:Hugo Martina 1856 0331.png

	Hugo von Langenstein: Martina

20

Dez hungers helle gloggen

In sin ore liutent

Die menge not betiutent

Beidiv nv vnd och aber

Siv eischent gersten vnde haber

25

Menic not im ruofet

So daz gesinde wuofet

Nach mengem hus rate

Fruo vnd och spate

131b,29

Siv heischint im die bonen

30

So muoz er aber honen

Erweisen vnde lisiv

Der tievil der var insiv

Gedenkit der vil arme

Daz ez got erbarme

35

Daz ez harzvo keme

Got si in widerzeme

Der mich herzvo bræhte

Und sin von erst gedæhte

Daz ich tumber mine clage

40

Muoz dulden alle tage

Siv ruefent aber nach salze

Nach fleisch vnd nach smalze

Owe ach vnd abir ach

Alsuz salzet er den bach

45

Vnd wirt sin muot beswæret

An frovden gar erfæret

Diz kvrz gemach er giltet

Dicke er sich vnderschiltet

Mit sinem hus gesinde

50

Er ist in och zelinde

So muoz er vf sich laden

Beide spot vnde schaden

Ist er aber zesure

Zehert von nature

55

So fuget sin hertekeit

Dem gesinde langes leit

131c,57

Och gewinnet er kinde

Div im och ein burde sint

Div er muoz besorgen

60

Dur siv in kvmber worgen

Svz wirt im not bechant

Sin wip heischet im gewant

Dur schirn gein dem froste

Gar vbir sine koste

Empfohlene Zitierweise:
Hugo von Langenstein: Martina. Hg. von Adelbert von Keller. Stuttgart 1856, Seite 331. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Hugo_Martina_1856_0331.png&oldid=- (Version vom 18.8.2016)