Seite:Hugo Martina 1856 0314.png

	Hugo von Langenstein: Martina

45

Do sprach got ze Noe

Min geist belibet niht me

Bi dem menschen langer frist

Wan ez gar fleisch ist

Siv namen dez fleischis war

50

Mit sinen gelusten gar

Und sprach aber do zestunde

Vz sinem gruozamen munde

Zwenzic iar vnd hundert

Si dem menschen vz gesvndert

55

Nach disem selben orden

Ist luzil dekeiner worden

124c,57

Elter fur daz selbe zil

Ez ist selzene vil

Daz nv vf der erde

60

Dekeiner eltir werde

Ir kvmet lüzel für war

Nv vber ahzic iar

Suz gat ez nach sage

Abe von tage zetage

65

Unde wahzit clage

Von dez todis iage

Swer sehzic iar ergrifet

Und dar vbir slifet

Dem wirt sin herze betruobit

70

So in daz alter vobit

Balde er danne crankit

Darzvo sin hovbit wankit

Uon amaht vnde ridet

Mengen kvmber er lidet

75

Dar zvo slewet im der geist

Uon alters not aller meist

Dez lebins in verdrivzit

Dez er cleine geniuzit

Der aten in vnsanfte gat

80

So er iht gegangen hat

Sin craft im entwichit

Er draset vnde kichit

Sin aten vbil smeckit

Von warheit vnverdeckit

124d,85

Sin brvst ist im verwüestet

Vngefuoge er huostet

Unhovelich er niuset

Sinen gelimpf er verluset

Empfohlene Zitierweise:
Hugo von Langenstein: Martina. Hg. von Adelbert von Keller. Stuttgart 1856, Seite 314. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Hugo_Martina_1856_0314.png&oldid=- (Version vom 18.8.2016)