Seite:Hugo Martina 1856 0238.png

	Hugo von Langenstein: Martina

25

Daz tusent tusent hundert

Mit tugenden sint besvndert

Die reinen muot hant erwelt

Die sin für eine dir gezelt

95b,29

Darzvo ich dir laze

30

Ein guot ebin maze

Jhesus der alle sinne

Erkande vz vnd inne

Von dem alle wisheit floz

Uz alder welte zwelf erkoz

35

Vnder den was einer

Noch ander me dekeiner

Der in an den tot gab

An dez heren cruces stab

Pfenninge vmbe drizic

40

Sines todis vil flizic

Dez doch niht engulten

Die andern wan die erfulten

Sine hohen botschaft

In der svzen minne craft

45

Dez sint frowen lobis wert

Der muot reines willen gert

Vnd ir eren wirde ganz

Uon einer frowen div den cranz

Ob allen frovwen leitet

50

Vf erde in himil breitet

Si aller frowen selde

In der tugenden gemelde

Uon ir claren kvsche

Div gar ane tusche

55

Alle frowen gestet

Vz in allen si glestet

95c,57

Mit loblichir stimme

Als div edil gimme

Vz dem roten golde

60

Dvr die sol man holde

Alle frowen iemer haben

Ir eren veste vmbe graben

Ist mit der eren genuht

Uon der selben frowen zvht

65

Der die engel singent

Vnd lobe wirde bringent

Der erbermede ein amme

Uon yesse dem stamme

Div da zallen ziten

Empfohlene Zitierweise:
Hugo von Langenstein: Martina. Hg. von Adelbert von Keller. Stuttgart 1856, Seite 238. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Hugo_Martina_1856_0238.png&oldid=- (Version vom 18.8.2016)