Seite:Hugo Martina 1856 0236.png

	Hugo von Langenstein: Martina

Vnd ir ere hie vernivtet

Der ist got wider zeme

50

Der welte vngeneme

Reine frowen sint ein hort

Hie der welte göte dort

Got dur eine frowen kam

Her vf erde vnde nam

55

Von ir sine menscheit

Sin gotheit da mit bekleit

94c,57

Wer mohte frowen volle loben

Sit si in himel da oben

Uolleclichen ge eret sint

60

Von der süezen megde kint

Der hat siv och vf erde

In so hohim werde

Fur alle creatur gemaht

So loblich so wol geslaht

65

Daz in niht gelichit

Ir reinekeit div richit

Beidiv erde vnd himil

Ir luter kivsche ane schimel

Aldie welt krœnet

70

Ir werder name der dœnet

Süeze in gotis ore

Vnd in der engel kore

Wol in die frovwen ere wegent

Der milte got hat gesegent

75

Daz er nieman vs schiet

Aller dirre welte diet

In einer frowen namen

Die er selbe ane schamen

Koz ze einer muoter

80

Und er ir svn guoter

Svz hat er wip gehœhit

Ir werdekeit geflœhit

In sin himilschlich gezelt

Zvo sines vater erbe gelt

94d,85

Ich gib in lobes vngezalt

Me danne lovbis habe der walt

Iht me so wirt gerechnot

Frowen lob vnd gotis gebot

Reiniv wip vnd engel

90

Der kvsche ein lylien stengel

Heizent siv von schulden

Der tugenden vbir gulden

Empfohlene Zitierweise:
Hugo von Langenstein: Martina. Hg. von Adelbert von Keller. Stuttgart 1856, Seite 236. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Hugo_Martina_1856_0236.png&oldid=- (Version vom 18.8.2016)