Seite:Hugo Martina 1856 0225.png

	Hugo von Langenstein: Martina

Div minne niht anders ist

Wan der vil svezir crist

Der vns dur minne kovfte

10

Da sich der milde slovfte

In die menscheit also cranc

Do der vil snelle swanc

In der megde tristkamer

Uon ir die menscheit namer

15

Da mit er sine hantgetat

Gekovfet vnd erloset hat

Div minne wunder hat geworht

Minne ist gar vnervorht

Sist alse der tot starke

20

Wan si von der arke

Der hohin gotheit fliuzit

Und swen si wil beguzet

Div sveze minne here

Seht alsolche lere

25

Git div starke minne

Herzin vnde sinne

Daz hat si wol beweret

Si hat gar vnerneret

90b,29

Gotis ekenpfen enbunden

30

In vil kvrzen stunden

Daz wart dem keiser kvntgetan

Wie siv mit grozin frovden wan

Uon dirre welte hin gevarn

Mit den engelslichen scharn

35

Do begunde dem vngehiuren

Alexandern frovde tivren

Daz er niht hatte harter

Mit menger valte marter

Vnd mit todes pine

40

Die gotis pilgerine

Furbaz me geletzit

In grozer not gesetzit

Dez in der tiefil kretzit

Der gein im iemer wetzit

45

Nv hœrent vmbe den veigen

Dienstman vnd eigen

Dez tiefils von der helle

Er welle alder enwelle

Daz im niht genuogte

50

Swaz er kvmbers ie gefuogte

Empfohlene Zitierweise:
Hugo von Langenstein: Martina. Hg. von Adelbert von Keller. Stuttgart 1856, Seite 225. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Hugo_Martina_1856_0225.png&oldid=- (Version vom 18.8.2016)