Seite:Hugo Martina 1856 0168.png

	Hugo von Langenstein: Martina

Der helle fivr wirt niht entzünt

Als div wariv schrift künt

Uon holtze noch von blaste

Noch von windis draste

45

Got hat ez so geschaffen

Den helleslichin affen

Daz ez niht mac erlöschin

Alsam die turren boschin

Brinnet ez vil stritclich

50

Zallen ziten nitlich

Och seit ein wissage werde

Daz och vnder der erde

Si div grimme helle

Und ir michil vngevelle

55

Daz wil ich och gelovbin

Daz die valschin tovbin

67c,57

Die vf erde hant gelebt

Und ie wider got gestrebt

Vnd die erde liebir haten

60

Ir süezin fruht ir senften schaten

Uerre furbaz in ir sinne

Danne die gotis minne

Die svn och nv beliben

In der erde vnd vertriben

65

Da die iemir langen tage

Mit rvwe senfteberer clage

Siv mvn sich wol erfullin

Alda der erde gullin

Der och ir herze ie hat gegert

70

Der svn siv werden wol gewert

Daz helle fiur brennit iemir

Vnd geluhtet doch niemir

Daz ieman sehe deste baz

Als dur ein trüebis glas

75

Ez brinnit alle stunde

Untz in der helle grunde

Vnd wirt doch niht gemindert

Die armen ez frovde hindert

Och ist div vinster also groz

80

Der nie vinster wart genoz

Wan si div lieht schuhten

Div in von gote luhten

Dez svn siv ane lieht wesin

Und vf allen vierin kresin

67d,85

Gemartert werden wunderlich

Empfohlene Zitierweise:
Hugo von Langenstein: Martina. Hg. von Adelbert von Keller. Stuttgart 1856, Seite 168. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Hugo_Martina_1856_0168.png&oldid=- (Version vom 18.8.2016)