Verschiedene: Allgemeiner Harz-Berg-Kalender für das Jahr 1926 | |
|
Die arm’ Männer, die noch drzu gehärten!
Ahmju gängs off dr Eisenbahn, dies ju freilich
noch net su viel goh. Kam ämol äne Fra
nohng Zerkler, aufgedunnert war wäß wie
Krenelin sechs Fuß in Lichten, un wollte sich
obnamme loßen. Ja, mänter, har kännte se
ower bluß gruß photegraphier’n, off die gewehnling
klän Bilder ging se mit ihrer Krenelin
net drauf. Mos wolltese machen? Sie merkte
dan Schpiet net un – goh wieder meh Gald
aus, bluß im ihrer Krenelin. Un weche Plohg
warsch, in su än Räfrock de Treppen nauf un
nunter zu laafen? Ihn zu trahn mußte iwerhaupt
gelarnt sein. Doch dos schad’te Alles
nischt, – die Mod war do un schwung ihr
Zepter iwer Jeder, eb se’s sich zähme kunnte
oder net. Dr Modeteifel faßt se ju nohch alter
Erfahrung Alle, Reiche un Arme, Alte un
Junge un – ich hette balle wos gesaht –
Hibsche un Haßliche. Doch endlich verlur ahch
disse Mod es Preh, die grußen Droht- un Ruhrun
Fischbän-Kerb verschwanden un off Anger
un Driften un Schutthaufen kunnte mr noch
lang die alten ausgedienten Geschtelle liehng
sahn. De arm Ehmänner, Kutscher un Schaffner
hatten wieder Ruh. Un die disse wannelnde
Glock erfunden un jahrelang su viele Millione
Nohchahmersch of dn gansen Ardball drmit gehatt
hot, war de Käserin Eischenie von Frankreich,
die dr gansen Walt de Mod (diktirte,
un an disser Dummhät mit dar Krenelin, die
dn arm’ Ehmännern su viel Galdkosten gemacht
un die sie doch zu än gans annern Zwack
sich hatte machen loßen, die Schuld hatte. Es
soll ahm Käner de Natur homästern.
Un doch war de Krenelin nischt Neies gewasen. Wie fast jede Mod all ämol aufgetraten is, un wärsche noch su absord, su warsch ahch mit disser gewasen. Zwähunnert Jahr frieher hatte all ä Gästlicher von dr Kansel rob drgehng lusgedunnert. Es war dar berihmte Prediger Jobst Sackmann in Limmer bei Hannover, dar in sän Predigten, die ’re nohch domoling Gebrauch in plattdeitscher (Calenberger) Schprohch hiel, kä Blot vor dr Mund nahm un mit scharfer Laug un Schpiet iwergoß, wos’r for Schoden an seiner Zeit ahnsohch. Wie Mannicher hatte gewinscht, ungesahn aus dr Kerch zu kumme, wenn bittre Werter von dr Kansel fielen, un wenn de ganse Gemän’ wußte, wan dar Obriß golt. Un doch, viellächt gerod dorim, war seine Kerch immer vull, ahch von hanneverschen Hoff kame se un dr huhche Adel fand sich än un wur gleichfalls von dan grohm Prediger viergenumme; doch mr war kluhk un nahm seine Buckelwesch gebillig hin. Disser Prediger hatte ahm immer racht. Wos ’r nu iwer dan Räfrock-Unfug, dar zu seiner Zeit aufgetraten war, sahte, war ju grob genung, doch lustig, un seitdan ich dos vor langen Jahren ämol gelasen ho, isses mr ahch net wieder entfall’n; äne kläne Prob don seiner der’m Art will ich hie doch wiedergahn. Har sahte:
„Tunneriepe un Stricke
Reihet se sick in de Röcke,
Dat soll stiepe henstahn,
Rein ehrlich Minsche kann dorbi hengahn.
En ollen Ballerjan
Hänget se üm’n Stinkerjan,
Den lehgen Püstetjan.
Dos war ä Deitsch, wies heitzutohk pon dr Kansel net meh runterkimmt; doch har hot bes an sän Lahmsend jeds Ding bän rachten Name genennt un is besonderich dn Modeteifel, dar in jänner Zeit tuller wie jetzt ausgeart’t war, in Wort un Sdrift machtig zu Leiwe gegange.
Doch ane Mod’ liest, wie gesaht, de annere ob ohne äner giehts net, dos wissen mr, wolln ahch nischt drwider han. Es „schiene Geschlacht“ war wieder „moger“ geworrn un off dn Normalimfang zurickgefährt. Mr mußte sich ower ärscht orndlich wieder an dan gans verännerten Ahnblick gewähne. De Ehmänner schimpten net meh, un de Kutschersch un Schaffnersch wuren wieder freindlicher; alle ower nahme se än drauf, daß dis Kreiz net sollte wiederkähren. De Kläder-Rachnunge wuren ringer, in dr Kaffeegesellschaft kunnten se wieder dichter beiänannersitzen, dr Mann brauchte off dr Schtros net meh hinter seiner Eheliebsten zu giehn un wenn Theater in „Schtadt London“ war, geniegte wieder ä Platz for jeder Fra. Su Wur denn Alles zefriedengeschtellt und de schpätern Jahre is doch lang net su viel Schtaab von äner neien Mod aufgewerbelt wie von disser.
De Zeit nohng Krieg hatte’s noch ämol drauf obgesahn, an Satansschträhch zu schpiel’n un dos sugenannte Masterschtick dr Schepfung, de weibliche Figur, zu verschippen. Mos do kam, war wieder in Frankreich ausgeheckt, in seiner Hauptschtadt Sodom. Dos war es Cul de Paris, bei uns korzwack Kih genennt. Es nahm net su viel Platz in Ahnschpruch wie de Krenelin, ower es war doch noch alwerner wie die. Do, wu dr Ricken sän ehrling Name verliert. wolltes dr Natur ä bissel nohchhalfen un su wur die Schteht mit dr Zeit immer hecher. Wos is do schließlich alle unner dr Klädung getrahn? Mausefalln un Pfanne, Näpp, Kastrolln, Schuh, Sofakissen un annre Polster,
Verschiedene: Allgemeiner Harz-Berg-Kalender für das Jahr 1926. Piepersche Buchdruckerei, Clausthal 1925, Seite 38. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Harz-Berg-Kalender_1926_041.png&oldid=- (Version vom 18.8.2019)