|
unbekannt: Ein kurtzweilig lesen von Dyl Vlenspiegel |
|
|
dem andern zů halß / vnd legt die schalen für Vlenspiegeln wider vnd sagt. Sehin leck dz vaß / der dotter ist heruß. Die andern gest lachten des / vnd Vlenspiegel mit in / vff den abent koufft vlenspiegel ein hüpschen apffel den hülecht er inwendig vß / vnd stieß den vol fliegen oder mucken / vnnd briet den apffel müßlichen / vnd schelet den apfel vnd bezettelt den vßwendig mit imber. Als sie nun des abentz wider zů disch sassen da bracht Vlenspiegel vff einem deller den gebraten apffel / vnd kert sich von dem disch als ob er mee holen wolt. Als er nun den rücken wendet / so greifft der holender zů vnd nimpt im den gebraten apffel von dem deller vnd schluckt den bald in / von stund ward sich der holender brechen / vnd brach sich auch alles dz er im leib het / vnd im ward gantz vnrecht / so dz der wirt meint / vnd die andern gest / er het im in dem apffel vergeben. Vlenspiegel sagt / dz ist kein vergifft es ist ein reinigung seins magens / wa einem begirigen magen bekumpt kein kost wol / het er mir das gesagt daz er den apffel so begirig wolt haben ingeschluckt / ich wolt inn haben dafür gewarnt / wan in den weichen eigern kamen kein mucken / aber in dem gebraten apffel lagen sie / dz müst er wider von im brechen / mit dem kam der holender wider zů im selbs dz es im nit schadet / vnd sprach zů Vlenspiegeln. Iß vnd brat / ich iß nit mee mit dir hetstu schon kromet foegel.
Vlenspiegel macht das ein frauw alle ir heffen entzwei schlůg vff dem marckt zů bremen.
unbekannt: Ein kurtzweilig lesen von Dyl Vlenspiegel. Straßburg 1515, Blatt CXIXv. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Ein_kurtzweilig_lesen_von_Dyl_Vlenspiegel.djvu/238&oldid=- (Version vom 31.7.2018)
