Seite:Duerer Underweysung der Messung 054.jpg

	Albrecht Dürer: Underweysung der Messung, mit dem Zirckel und Richtscheyt, in Linien, Ebenen unnd gantzen corporen

Aber ee das jch die figuren an heb zu^omachen / will jch vor ein wenig von den wincklen reden / Erstlich soll man mercken / das ein winckel vnd ein eck glech linien haben / Aber die vnderschid des winckels vnd eckes / im werck ist diser / Wenn du aussen auf die scherpf sichst / so heist es eyn eck / sichstu aber jnnen in die tyfe / so heist es ein winckel / das hab jch vnden aufgeryssen / zum eck außwendig gesetzt ein .a. vnd in winckel ein .b.

eck     winckell

3

Man soll auch mercken das dreyerley winckel vnd eck sind / ein rechter ein weyter vnd ein enger / die werden leichtlich also gemacht / Erstlich zu dem rechten winckel / reiß zwu^o gerad lini / ongeferlich creutzweiß vber eynander / vnnd in dem puncktenn da sie an eynander abschneidenn / setz ein .a. vnnd nym ein zirckel / setz jn mit dem ein fuß in das .a. vnd mit dem andern reiß durch drey o^ertter der gestrackten linien / Vnd wo sie abgeschnyden werden / da setz .b.c.d. vnd zeu^ech .b.c. vnd .c.d. mit geraden linien zu^osamen / so ist .b.c.d. ein rechter winckelhacken / Darnach zeu^ech die lini .c.d. lenger hynauß / biß an das end .e. vnd neig die aufrecht lini mit dem end .b. gegen dem .d. so begeben sich zweyerley winckel / ein enger zwischen .b.d. vnnd ein weytter zwischen .b.e. dann was eim teyl genu^omen / wirdet dem andern zu^egelegt / diß hab jch vnden aufgeryssen.

4

Man soll auch wissen / wenn zwo gerad linien / durch einander creutzweiß gleich getzogen werden so geben sie vier recht winckel / werden sie aber vngleich durch einander getzogen / so werden zweyerley winckel / allweg die gegen eynander vber steen die sind gleich an einander / sie sind weit oder eng wie das vnden aufgeryssen ist.

gleich / wincklich     weit / eng

5

Dise dreyerley winckel mu^egen auch mit krumen linien getzogen werden / außgebogen als wen zwen zirckel durch einander gend / oder eingebogen hol / als wenn zwen kegel aussen in einem punckt an ein ander anru^oren / so machen sie zwen solch winckel / es ist auch die endrung in kleinen vnnd grossen zirckelryssen / die man im winckel zu^esamen zeu^echt / Es werden auch winckel getzogen mit zirckelryssen in ein ander / die ein form gewinen wie die eber zeen / die mu^egen mit gleichen zirckellinien

Empfohlene Zitierweise:
Albrecht Dürer: Underweysung der Messung, mit dem Zirckel und Richtscheyt, in Linien, Ebenen unnd gantzen corporen. Nürnberg, 1525, Seite 54. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Duerer_Underweysung_der_Messung_054.jpg&oldid=- (Version vom 31.7.2018)