Seite:Duerer Underweysung der Messung 020.jpg

	Albrecht Dürer: Underweysung der Messung, mit dem Zirckel und Richtscheyt, in Linien, Ebenen unnd gantzen corporen

Item noch eyn andre schneckenlini macht man auß eynem rechten zirckelryß / die auch die steynmetzen zu den stygen gebrauchen / sie wirdet aber billicher eynn schrauffen lini genant / doch man nenn sie wie man will so ist es eynn nu^etze lini / darumb^[1] will jch sie hynnach auch leren machenn / vnnd wer suchen will mag vil darauß finden/ Reyß erstlich eyn runden ryß wie vorangezeigt auß eim Centro .a. den theyl mit einer aufrechten lini / durch den Centrum .a. in zwey gleiche teil vnd setz oben da der zirckelryß geru^ert wirdet .12. vnd vnden .6. darnach far auß dem punckten .12. mit eyner geradenn lini vbersich / so ferr du der bedarfst / der end sey oben .a. Darnach schneyd dise auffrechte lini vnden nahent bey dem grund des zirckelryß mit eyner zwerchlini .c.d. zu^ogleichen winckelen ab / der end sey .b. Darnach theyl den grund der zirckellini mit punckten in .12. gleiche theyl / vnnd setz jr zal darzu^o / vnd heb zu^o negst bey der seytten .12. an zu^ozelen .1/2/3/etc. byß du wider komst zu^o zwo^elffen / aber darnach muß die zal fortlauffen / vnd so weyt du der bedarfst auff eynander gestelt werden / also kumt zum ersten .13. auff eins .14. auff .2. etc. / Also mag man die zal / drey / vier / fu^enff / mal / vnnd so offt man will vbereynander ziehen vnd fu^eren / nach dem man eyn schnecken hoch machen will / So nun diser grund zu^ogericht ist / alß dann puncktir die auffrecht lini .a.b. so in vil theyl als du wilt / vnd setz die zyffer darzu^o vnd heb an bey end des .b. vbersich zu^ozellen /1/2/3/4/etc. Darnach far auß dem punckten des grundes .1. auß der zirckellini vbersich durch die zwerch lini .c.d. darnach far auß der aufrechten lini .a.b. von dem punckten .1. mit einer zwerch lini gegen der auffrechten die auß dem grund des punckten .1. vbersich gezogen ist / Wo dann dise ein eck schliessen da setz auch ein punckten .1. also thu^oe jm durch die gantz zal des grundes vnd der auff zognen lini .a.b. durch alle punckten / auch in der vberlauffung der zal / So nun die schneckenlini allenthalben also puncktirt ist / alßdann zeu^ech die schnecken lini von der hand darein wie jch dann das hynnach hab auffgeriessen / Item die schneckenn lini mu^egenn auch von punckt zu^o punckt ecket getzogenn werden / Man mag auch ein solchen schnecken zwifach machen in seinem gang / Erstlich macht man die spindel jm schnecken gerad vnd gantz / So mag man sie auch holl machen / oder gewundene also das man von oben dar durch byß auf den gru^end sicht / wie dann die Steynmetzen das in jrem aufreissen sollen wissen zu^o machen / vnd durch verru^eckung der grundbretter in das werck ziehen Item auß diser vorgemelten lini macht man schrauffen von eim zweyen dreyen oder vier gengen etc. da mit man so schwer vnnd starck ding mag heben vnnd brechen das sich deß zu^ouerwundern ist.

1. Vorlage: darnmb

Empfohlene Zitierweise:
Albrecht Dürer: Underweysung der Messung, mit dem Zirckel und Richtscheyt, in Linien, Ebenen unnd gantzen corporen. Nürnberg, 1525, Seite 20. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Duerer_Underweysung_der_Messung_020.jpg&oldid=- (Version vom 31.7.2018)