Alle die so suffen brassen
vnd mer denn syben massen fassen
Vnd habendt dennocht nit genuog
sie leren den dor zuo den kruog
Die muoß man ietz all sammen loben
doch handts an sant Niclausen aben
In dem schuo ein narren funden
der ist in in den halß verschwunden
Vnd ist der nar kein christen nit
darumb ir ieder vff in schüt
Das er getauffet werd von in
Vnd nit vnchristlich far do hyn
Dem müller ziehendt sie das bret
das mans vor todt dreit an das bet
So ligend dann die selben kunden
am morgen me dann drythalb stunden
Vnd kynnendts gar nit fantasyen
wo sie doch vff erden lygen
Biß er sich kum selbs vber redt
das er do lyg in seinem bett
Darnach muoß er erst lang besynnen
wol fierdthalb stundt biß er würt ynen
Wie er doch sey necht schlaffen kummen
ob es der müller hab vernummen
Hilfft in denn got das sie vff stondt
vmb myttentag herfürher gondt
Sie fahend sie denn wider an
Do sie es necht gelassen han
