Mit disem sack geschlagen werden
alle weib mit boesen berden
Die ire augen vnder schlagen
wie sie die hundt zuor metzig tragen
Ihr brüstly vff ein schefftly stellen
als ob sie sie verkauffen wellen
Du darffst nit rüsten vff ein schragen
an den marck sie feil vmb tragen
Du findst wol einen der sie kaufft
vnd nit ein drit zuo marckt drum laufft
Gar hoefflich sie zuo kirchen dretten
nit das sie wellen daryn betten
Das prediger stuelil dreit die magt
ist es das meyn fraw denn clagt
Ach gnedige fraw spricht sie behendt
was clagt ir \ ich thuo was ir wendt
Sie hatt den kopff verdarraßt gar
als gieng ein schleyer üll do har
vnd went sie manch den mannen zutz
so stadt sie wie ein faßnacht butz
Wie ein schü butz vff dem landt
vnd nympt dann yn ein weyten standt
Die andren muessendt wychen all
die boeck die dulden kein im stall
Welche wyber also brangen
so sie zuo kirchen hyn sindt gangen
Von denen mag ich froelich sagen
dz sie mit dem schlepsack sint geschlagen
