wieder die Hussiten an / vnnd wurde auff solchem Papst Eugenius der Vierdte / weil er dahin citirt worden / vnnd nicht erscheinen wolte / abgesetzt / vnnd an seiner statt Anno 39. Amadeus, Hertzog von Savoja / erwehlet / vnd ihme der Nam Felicis V. gegeben: Da dann in solcher Zeit die Pest allhie starck rumort / vnd viel vornehme Leuth hinweg genommen hat. Besiehe hievon vnd anderm mehrern / Item dem Kloster zu S. Alban / dem Teutschen Hauß / S. Marien Magdalenen Kloster / S. Leonhardts Kloster / Augustiner Kloster / S. Martins Pfarr-Kirch / vnd dem Spital / auch von dem / was hieoben gesagt worden / B. Rhenanum de Rebus Germanicis, Stumpfium in der Schweitzer- vnd Christian Wurstisen in der Baßler Chronicken; Munsterum in der Cosmographi, sonderlich der letzten edition; Cluverium de antiqua Germaniâ; Grasserum in Itinerario Historico-Politico, vnd der Schatzkammer / P. Bertium lib. 3. Comment. rer. Germ. Hentznerum in Itiner. Germ. (alle 3. auch von Augst / selbigem altem Gemäwer / alten Müntzen / vnd dergleichen) Huldr. Frölich / in Beschreibung dieser Statt / Theod. Zuingerum in Meth. apodem. l. 3. p. 161. et seqq. Freherum in not. ad P. de Andlo. c. 15. in fin. (daselbst er auß Christiano Urstisio, oder Wurstisen / obgemelt / sagt / daß die Baßler deß Reichs Fischer gewesen / wie noch ihr Wappen / nemblich der Fahr Stachel / anzeige) Joan. Grossij Tractat von den Inscriptionibus, vnnd Epitaphiis allhie / vnnd Martini Zeillers Itinerarium Germaniae, sonderlich im ersten Theil. Ein viertel Stunde ausserhalb der grössern Statt Basel ligt an der Byrs / oder Birs / (so in dem Gebürg Iurasso, daselbst Pireport genannt / entspringet) das Siechenhauß / sampt einer Kirchen / geheissen zu S. Jacob / da An. 1444. zwischen den Eydgenossen / vnnd dem Delphin auß Franckreich / die so berühmbte Schlacht geschehen / in welcher 1600. Eydgenossen / mit 30000. Frantzosen / zehen gantzer Stunden lang gekämpfft haben (darvon ihrer nur 16. entkommen / die vbrigen alle / vnd der Frantzosen 6000. blieben seyn sollen / wie beym gedachten Stumpfio hievon ein mehrers lib. 12. c. 14. zu lesen.
Es hat die Statt Basel ein zimbliches Land / in vnderschiedliche Vogteyen vnnd Aempter / getheilet / darunder Ramstein / so ein Bergschloß / Homberg / oder Homburg / Farnsperg / so ein Schloß hat / Riechen / vnd Münchenstein / Schloß vnd Flecken / zwischen Basel vnnd Dorneck / seyn; Welches letzte etwan ein Behausung vnd Bevestigung der München von Basel / zugenannt von Münchenstein / gewesen / ehe es an die Statt Basel / von der es ein Stundt gelegen / kommen ist. An. 1483. am Montag vor dem Auffartstags / zogen die von Solothurn eylends für Münchenstein / das zu erobern / belägerten das drey Tag / zogen aber vnverrichter Sachen davor wider ab. Stumpfius l. 12. c. 20. Es hat auch wolgedachte Statt Basel zwey Stättlein vnter ihr / nemblich
In der Landgraffschafft Sißgäw (so Bischofflich Baßlerisch) an der Ergetz / vnd ein halbe Meil Wegs vom Rhein gelegen / so zwar klein / aber wol erbawt / da männiglich / so nach Meyland in Italien / oder nach Lyon in Franckreich reyset / durchziehen muß. Ist vor Zeiten der Grafen von Homberg gewesen; Aber / bey Regierung Käysers Sigismundi, sampt Wallenburg / Pfandsweise / vom Bistumb Basel / an welches es von denen von Homberg kommen / an die Statt Basel gelangt. Hat doch etwas eygner Burgerlicher Policey / Gericht / Rath / vnnd Freyheiten. Man sihet noch alt Römisch Gemäwr da / wiewol dieser Ort An. 1381. ein jämmerliche Brunst erlitten hat.
Am Ende deß Jurats gelegen / so der Rauracorum Wall vnd Vestung / wider die Römer / gewest seyn solle. Hat das Wasser Ergetz / vnd ein Schloß / so auff einem harten Felsen liget. Ist vor Zeiten / wie gemelt / auch Gräfflich Hombergisch gewesen. Vnd kompt man hieher / wann man von Genff / Solothurn / vnd andern Orthen / vber das hohe Gebürg Jura / allhie der Oberhauenstein genannt / nach Basel reyset / von welcher Statt diß Stättlein Wallenburg bey fünff Stunden gelegen ist.
Matthäus Merian: Topographia Helvetiae, Rhaetiae et Valesiae. , Frankfurt am Main 1654, Seite 49. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:De_Merian_Helvetiae,_Rhaetiae_et_Valesiae_049.png&oldid=- (Version vom 2.4.2020)
