Clara situ populoque frequens, murisque decora, etc.
Vnd ein anderer:
Urbs Decus Imperij, quâ primos Cesar honores
Accipit, et titulum Regni sceptrumque reportat.
Es hat diese Statt zu den Zeiten Caroli Magni vnnd folgendes biß in das 1343. Jahr einen geringen Bezirck gehabt / wie an der alten Stattmauren an der Judengassen / vnd von dem Bornheimer biß an den Catharinen Thurn / vnnd fürter den Hirschgraben hinunder noch zu sehen / von dannen sie in jetztgemeldtem Jahr erweitert / vnd nach vnd nach / mit schönen Gebäwen gezieret vnd erbawet worden.
Es wollen etliche / daß / vor der Zeit / ein Römischer König nit in S. Bartholomaei Kirchen / vnd in der Statt Franckfurt / so die Zeit der Wahl vber verschlossen blieben / sondern draussen auff freyem Felde erwöhlet / vnd wann die Wahl einhellig gewesen / darauff in die Statt gelassen worden sey: So aber durch mißhellige Wahl ihrer zween erwöhlet / daß deren die Bürger keinen in die Statt gelassen / es habe dann zuvor dieselbe gleichsamb einen Gewalt gelitten / vnd der eine von den Erwöhlten seinem Widersacher mit Krieg angriffen / oder sonsten den Sachen rath geschafft / also daß der Eine mächtig regierte / der Ander aber mit Spott / vnd Furcht abzoge: Wie dann Weygand Gerstenberger in der obgedachten Franckenbergischen Chronic / am 26. Blat / auß der Thüringer / vnd Straßburger Chronicken / schreibet / daß Landgraf Heinrich in Döringen vnd Hessen / erwöhlter Römischer König / mir Käyser Friderichs deß Andern Sohn / Hertzog Conraden in Schwaben / vor Franckfurt / vmb die Römis. Cron gestritten / vnnd König Heinrich den Streit gewonnen habe / Hertzog Curt aber flüchtig worden seye. Dergleichen erzehlen andere / von Keyser Ludwigen dem Vierdten / vnd Friederichen dem Dritten / so wider ein ander erwöhlet worden; Item von Graf Günthern von Schwartzenburg / so Franckfurt belägert / bey 2. Monaten darfür gelegen / vnd endlich daselbsten eingelassen worden seye / als er mit obgemeltem Käyser Carlen dem Vierdten / vmb die Römis. Cron / zu streiten hatte. Vnd schreibet Aventinus in dem 8. Buch seiner Bayrischen Chronic / am 409. vnd folgenden Blat / daß der newerwöhlte Römische König Rupertus / Pfaltzgraf bey Rhein / sich für Franckfurt ins Feld gelägert / vnd 4. Wochen nach dem alten Brauch / darvor gelegen seye / als die Brieff von ihm außgangen / anzeigen / darinn das Datum also lautet: Wir Ruprecht von GOttes Gnaden / Römischer König / allzeit Mehrer deß Reichs / Datum im Feldläger vor Franckfurt Exaltationis S. Crucis. Besihe auch die Limpurgische Chronic von obgedachtem König Günthern / vnd der Gewonheit deß Heil. Reichs am 4. Blat.
Dessen aber vngeacht / wollen andere / daß man dergleichen bey keiner strittigen Wahl jemahls gehört /seye auch nicht in Vbung kommen / vnd thun die Historici, so vmb selbige Zeit gelebt / dieses Gebrauchs mit keinem Wort gedencken; wie hievon in Christophori Lehmans Speyrischen Chronic letzten Buchs / 34. Capitel / vnd beym Christophoro Besoldo in dissertat. Nomico-politicis lib. 2. dissert. 3. p. 190. et in Thesauro practico voc. Franckfurt / pag. 262. der ersten edition, zu lesen. Es pfleget aber die erste Wahl von den Herrn Churfürsten anfangs auff dem Rathhauß / der Römer genannt / fürgenommen zu werden: Alsdann kompt man erst in die obgedachte S. Bartholomaei Kirchen / oder den Thumb / in dessen Sacristey / so zwar zu einem solchen hohen Werck zimlich eng ist / endlich ein gewisser Römischer König erwöhlet wird. Das Pancket wird hernach auch auff gedachtem Rathhauß / in dem Saal gehalten; vor welchem / nemlich auff dem Platz / man den Ochsen brätet / vnnd dahin ein grosse menge Habern schüttet: Laufft auch zu solcher Zeit der Röhrkasten oder springende Brunnen / von roth- vnd weissem Wein. Neben dieser Hochheit / daß nemblich die Römische König allhie sollen erwöhlet werden / hat diese Statt auch sonsten herrliche Privilegia, von denen Magerus de Advocatia armata cap. 15. n. 118. seq. besagter Besoldus de Jure et Imperio Imperialium civitatum, vnd Limnaeus de Jure publico lib. 7. c. 16. Vnd von den ansehenlichen / vnnd in gantz Teutschland vornembsten Jahr-Messen /
Matthäus Merian: Topographia Hassiae. Frankfurt am Mayn: Matthäus Merians Erben, 1655, Seite 51. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:De_Merian_Hassiae_076.jpg&oldid=- (Version vom 31.7.2018)
