Es gehören in den Hochlöblichen Ober-Rheinischen Creyß / (dessen Außschreibende Fürsten dieser zeit der Herr Bischoff zu Wormbs vnnd der Herr Pfaltzgraf Ludwig Philips zu Simmern etc. seind /) die Bischöffe von Wormbs / Speyer / Straßburg / Basel / Bisantz / Sitten / Losanna / Metz / Tull / Verdun / vnnd Genff; Der Hochmeister / deß Johanniter Ordens / die Pfaltzgrafen / wegen der Graffschafft Spanheim / Zweybrücken / vnd Veldentz; die Landgraffen in Hessen; die Hertzoge in Lothringen; die Hertzoge in Savoja; die Aebbte von Fulda / Hirschfeld oder Herßfeld / Murbach / Münster in S. Gregorienthal / vnnd Pfriem im Bisthumb Chur; die Abbtissin von Kauffingen; die Pröbste zu Weissenburg / vnd Odenheim; die Graffen vnd Herren von Nassaw Sarbrücken; die Wetterawische Graffen; die Rheingraffen; die von Falckenstein; von Bitsch; Hanaw; Salm; Leiningen / Eysenburg / Witgenstein / Mörßburg / Rapoltstein / Rapoltzkirch / etc. Die Adeliche Collegia zu Gelnhausen / vnnd Fridberg; Die Stätte Basel / Keysersperg / Türckheim / Münster in S. Gregorienthal; OberEhenheim / Colmar / Straßburg / Roßheim / Schlettstatt / Hagenaw / Cron-Weissenburg / Landaw / Mülhausen im Sundgöw / Speyer / Wormbs / Franckfurt / Fridberg / Wetzlar / Metz / Tull / Verdun / KauffmansSarbrück / Bisantz / vnd Genff / Darunder gleichwol nunmehr sich viel befinden / die eximirt werden: als die Bischoffe zu Sitten / Losann / Metz / Tull / Verdun / vnd Genff: der Abbt zu Pfriem / im Bistum Chur: die Graffschafft Bitsch: die Stätte / Basel / Mülhausen im Sundgöw / Metz / Tull / Verdun / Kauffmans-Sarbrück / Genff / etc. Von welchen zum Theil in Beschreibung deß Schweitzerlands / deß Elsaß / der / Vndern Pfaltz / daselbsten auch Savoja / Lothringen / Bisantz / Metz / Tull / Verdun / Bitsch / vnd Kauffmans-Sarbrück / einkommen sein) vnd deß Chur: vnd Vnder-Rheinnischen Creyses / albereit von vns möglicher / vnd gebührender Bericht / geschehen. Die vbrige aber / vnd ihre vornembste vnnd bekandtiste Stätte vnnd Orthe sollen in diesem Tractat eingebracht werden; Wie auch Gelnhausen / vnnd die Graffsafft Nassaw-Beylstein / etc. so sonsten zum Nider-Rheinischen Creyß gehörig seyn. Item Nassaw-Dillenberg / so sonsten zum Westphälischen Creyß gezogen wird.
Vnnd erstlich zwar / was das hochlöbliche Fürstenthumb vnd Landgraffschafft Hessen anbelangt / so hat Wilhelm Dilich eine Chronic davon außgehen lassen; damit aber nit jederman zufrieden gewesen / dieweil er im Ersten Theil derselben geschrieben / daß Ober-Hessen / so viel daß Lager anbetrifft / vnder andern / in sich auch begreiffe / die Graffschafft Dietz / das Rinckgaw / die Wetteraw / vnnd derselben etliche Reichs: Item Hanawisch: Isenberg: vnd Mäyntzische Stätte vnd Schlösser; die Graffschafften Königstein /
Matthäus Merian: Topographia Hassiae. Frankfurt am Mayn: Matthäus Merians Erben, 1655, Seite 1. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:De_Merian_Hassiae_004.jpg&oldid=- (Version vom 31.7.2018)
