auch nach solchem durch die büchsen / zwo creütz linien mit dem circkel / vnd sey dir a c die mittel lini des mittags / vnd d b die lini des anfangs ♈ vnd ♎ / darnach teyl das fierteyl a b / in 50. teyl auff dem papir / darinnen such eleuationem poli auff der selben zal / vnd auff das centrum e leg die regel vnd / wo sye die circkel lini d c abschneidt / daselbst mach einen puncten f / als dann setz den circkel mit eim fuß in das d / vnd den andern in das f / mit solcher weitin geh in die büchsen / vnd setz ein fuoß in das o / mit dem andern geh hinein auff die mittag lini gegen dem compas / daselbst mach ein puncten / darein solt du den stefft stecken / der soll als lang sein als hoch die büchsen ist / also das er mitten in der büchßen stee / vnd ein centrum geb / gegen yedem aussersten circkel.
Darnach geh widerumb auff das papirin instrument / vnd nym die weitin c f eleuationem equinoctialis / vnd trags in die büchsen / vnd setz den einen fuß in das a / mit dem andern mach einen puncten auff die mittag lini / darnach thuo den circkel auff / setz jn mit eim fuß in den puncten des steffts / vnd mit dem andern in den yetz gemachten puncten / vnd reiß ein lini durch das d vnd b / vnd durch den yetz gemachten puncten / so hastu die lini ♈ vnd ♎ / wilt du nun die andern .12. zeychen jnschreiben / so mach die .12. zeychen lini in den quadranten / also wie du oben gelernet hast / nach der weitin des circkels a b / vnd nim die weitin der .12. zeychen lini ab in der circkel lini a b / vnd setz sye auß dem mitlen puncten der lini ♈ vnd ♎ / vnd auff die mittag lini / darnach zeüch mit dem circkel linien dardurch auß dem puncten des steffts / von einem ort zuom andern der büchsen / so gibt dir die lenger lini den ♋ / die kürzer ♑ / die selben zeychen beschreib vßwendig auff den ort der büchsen / wilt du dann die stund lini darein schreiben / so theyl die linien arietis vnd libre in zwoelff gleiche theyl / vnd die lini capricorni in acht gleich teyl / die lini Cancri in sechtzehen gleich theyl / vnd zeychne allwegen die selbigen drey nechsten puncten neben der mittag lini mit einer geleichen lini zuosammen / mit einem papirin linial / das sich biegen laßt / vnd schreib jhr zal in die stund vor mittag gegen der lincken handt / oder gegen der stund nach mittag / gegen der rechten oder dem b / vnd wie du obgemelter ler
Georg Vogtherr: Ein wolgegründs kunstreichs Summari Buechlin / aller Sonnen Vhr / auff acht oder vier eckete stecklin / in Büchsen / Cylinder / vnd auff Guldne ring / Auch auff glaß / alle mauren / schreg oder vnschreg zuomachen. Auch wie man alle schrege vnd außschlag der grad an yedem hauß oder fenster / leichtlich vnd gerecht finden solle., Straßburg 1544, Seite 41. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:DE_Sonnen_Vhr_41.jpg&oldid=- (Version vom 1.11.2019)
