lis / mit solcher circkels weitin setz den einen fuoß in den mitteln puncten b des grundts oder fundaments / vnd mit dem andern fuß reissz ein gantzen circkel über alle vier creütz linien / die selben puncten / so der circkel macht in den vier linien / bezeychne also / das auff der kürtzsten linien an yedem ort werd gesetzt i / Durch die selben zwen puncten e / reissz zwo gerad linien / auff yeder seiten eine des circkels / also das sye gleicher weitin steen durch vnd durch / von der mitteln linien / wie oben gelert ist / Darnach theyl den mitteln circkel in 24. gleich theyl / Also zuom ersten in 6. theyl / Darnach wider yeglichs 6. theyl in 2. theyl. Darnach wider yeglichs 2. theyl in 2. theyl / so hastu 4. theyl. Durch die selben 24. theyl / mit puncten auff dem circkel bezeychnet / reissz durch ein yeden ein gerade linien / vnd durch das centrum b / von einer linien e zuo der andern / Darnach widerumb / reissz allweg zwen vnd zwen puncten auff beyden linien e / überzwerchs zuosamen / gleich in gestalt einer leytern. Als dann hastu die horologia Equinoctialis / Orientalis / vnd Occidentalis. Nun zuo machen das horologium verticale / das ist / an die maur / So gehe wider hinauff in den Quadranten / vnd setz den circkel mit einem fuoß in das e / den andern in das a / so hastu die laenge des halben diameters des circkels verticalis / Mit solches circkels weitin / geh widerumb in das fundament / vnd setz einen fuß in das e / auff welcher seiten wilt / mit dem andern fuß mach ein puncten auff der selben lini e / c / vom circkel hin dan den zeychen mit d / Auß dem selben puncten d / reissz gerade linien / biß in yeden puncten der zwerch linien / leyter weiß daran bezeychnet / So hast du die stund linien des horologiums Verticalis. Des gleichen zuo machen das horologium Horizontalis / vnd setz ein fundament in das ander e / vnd zeychen auff der linien c / e / hinauß am puncten a / Auß dem selben zeüch auch linien / wie vor gesagt ist / So hast du das horologium Horizontale / wie du dann in der grossen figur augen scheinlich begreiffen magst / hye nach getruckt.
Georg Vogtherr: Ein wolgegründs kunstreichs Summari Buechlin / aller Sonnen Vhr / auff acht oder vier eckete stecklin / in Büchsen / Cylinder / vnd auff Guldne ring / Auch auff glaß / alle mauren / schreg oder vnschreg zuomachen. Auch wie man alle schrege vnd außschlag der grad an yedem hauß oder fenster / leichtlich vnd gerecht finden solle., Straßburg 1544, Seite 21. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:DE_Sonnen_Vhr_21.jpg&oldid=- (Version vom 31.7.2018)
