1215. August 6. Im Schlosse Kevernburg. Erzbischof Albrecht II von Magdeburg bestimmt die Einkünfte der Propstei (von S. Nicolai?), worunter auch solche zu Mehringen, und fügt einige andere Anordnungen bezüglich des dortigen Gottesdienstes hinzu.
In nomine sancte et individue trinitatis Albertus Dei gratia sancte Magdeburgensis ecclesie archiepiscopus et apostolice sedis legatus. Pastoralis officii providentia postulat, ut ea, que ad ecclesiarum profectum et fratrum concordiam invenerimus esse statuta, previa ratione auctoritatis et scripturarum nostrarum munimine roboremus, ne questiones abolite reviviscant et morbum patiantur sopite controversie recidivum. Nos ergo pie recordationis Wichmanni archiepiscopi, predecessoris nostri, vestigiis inherentes legationis, qua fungimur, auctoritate statuimus innovantes, ut reditus prepositure ecclesie redditibus ea semper maneant separatione divisi, ut prepositus, contentus reditibus subnotatis: villa Baredorp cum omnibus attinentiis suis, tribus talentis de v mansis in villa Innesleve, duobus talentis de iv mansis in Olvenstede, duobus talentis de v mansis in Wellen, de villa videlicet Bartorp cum omnibus pertinentiis suis, xv talentis1 in Wellen, duobus talentis de iiij mansis in Weddingen, sex talentis de Meringhen, nihil preterea iuris habeat in omnibus ceteris bonis, que vel eadem ecclesia in presentiarum quiete possidet vel in futurum largitione regum, donatione pontificum aut aliis iustis modis poterit adipisci, sed canonici ecclesie eiusdem plenam habeant et liberam facultatem tam in locandis villicationibus eorundem bonorum et ceteris disponendis ordinare, que suis providerint utilitatibus expedire, ita ut ipsorum dispensis omnibus se nullus unquam prepositus immiscat vel eis in aliquo sit molestus. Prepositus autem plenam habeat potestatem locandi beneficia custodie, scholasterie et alia, que ad preposituram pertinere noscuntur et locare ipsi consueverint.---Testes huius rei sunt: Theodericus prepositus de Northusen, Gerbertus ecclesie beati Sebastiani canonicus, Hermannus et Heidenricus ecclesie beati Nicolai canonici; Albertus de Arnstein vicedominus curie nostre, Heidenricus et Ropertus marschalci curie nostre, Albero de Wippere2, Heinricus de Rosla, et alii quam plures. Acta sunt hec in castro Keverenberg, anno ab incarnatione Domini m.cc. xv. Datum per manum Heidenrici notarii nostri, viij Idus Augusti, pontificatus nostri anno nono.
Otto von Heinemann (Hrsg.): Codex diplomaticus Anhaltinus. Band 2. , Dessau 1875, Seite 14. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:DE_CDA_2_014.jpg&oldid=- (Version vom 31.7.2018)
