Seite:Briefwechsel Hildebrand Veckinchusen 452.jpg

	Wilhelm Stieda (Hrsg.): Briefwechsel Hildebrand Veckinchusen

452. Gerwin Marschede an Hildebrand Veckinchusen in Brügge.

Rev. St.-A. Orig. Pap. Adr.: Dem erbaren manne Hildebrant Veckinchu^esen to Bru^egge littera detur.

Vruntlike grote vorgescreven. Wetet Hildebrant, gude vrunt, wes ik ju^e gesant hebbe to Flandern wart myt den ersten in Worme, dat vinde gi wol in anderen breyven. Item wes ik ju^e nu^e sante in Wydenbru^egge, dat hebbe ic ju^e unde mynen broder wol gescreven darby.

Item so sante ik ju^e to Lubeke wart an Tydeman Brekelvelde an wasse an su^elver bet den op 550 marc. Vortmer so denke ik ju^e nu^e to senden in Jacop Oliesleger an werke an wasse an marten op en 200 marc ofte mer, wante ik hebbe was unde marten unde ic meine my solen werden by 3000 werkez. Est alzo, dat se my nicht en werden, so wel ik ju^e sulver ofte goet darvor senden to Lubeke wart.

Item de Yperschen unde de scharlaken sint noch al unvorkoft, de scharlaken es hir lancsam gelt, ik wil gerne des besten darby ramen unde doen dat ik kan. Ik hebbe de scharlaken vele luden angeboden ok heren, doemheren, papen, dar wel noch ter tyt neymant an; Got sy myt ju^e. Item de 12 ℔ gr. wel ik ofte Got wil wol betalen. Gescreven des donnerdages na pingesten.

Gerwin Marschede.

453. Gerd van Mynden aus Brügge an Hildebrand Veckinchusen.

Rev. St.-A. Orig. Pap. Adr.: Dem ersamen Hildebrant Vyckinchusen sal desse breff.

Vruntlike grote tovoren an mynen guden vrunt Hildebrant Vickinchusen. Ju geleve to weten, dat ik juwen breff wol vorstan hebbe, de geschreven was 24 in september alse ghy schriven, dat ghy der sake gerne en ende hadden van Everde unde van Kovelde, wes ju van den gelde boren mechte, des al gen not is alle dink to vorhalen. Ik hebbe myt Gert Lenstendike darvan gesproken, dat he Everde solde seggen, dat Evert unde Kovelt solden by ju gan unde reken myt ju, wes ju van den gelde boren mochte. Nu secht Evert van Megen aldus, he en wet nicht, wovele Hildebrant Suderman utgelecht heft, darumme steyt dar gen ende aff to maken, er Hildebrant hir kumpt. De sal hir in kort komen, dar mot et upbliven stande. De gesellen van unsen dordendel, de sint mestich al en wechgetoghen, darumme kan ik allene dar up desse tyt nicht to don, men jo doch, ik sal nicht afflaten, ik sal et Everde unde Kovelde hartliken segghen, dat se es en ende maken. Wy wult dar nicht lenger mede liden. Hirmede sit Gode bevolen. Geschreven to Brugge 25 in september.

Gert van Mynden.

Empfohlene Zitierweise:
Wilhelm Stieda (Hrsg.): Briefwechsel Hildebrand Veckinchusen. S. Hirzel, Leipzig 1921, Seite 452. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Briefwechsel_Hildebrand_Veckinchusen_452.jpg&oldid=- (Version vom 31.7.2018)