wente hadde ik em myne pande set, so en hadde he ok des eghendomes van den hus nycht over. Unde ok so schole gy weten Hyllebrant, leve man, also gy my scriven van den klederschape, dat ik dar schal ston laten, dat en wylen se nycht lyden unde se bedet my dar 12 marc vor unde wyle ik et vorlaten, dat mach ik don, ofte ik mot et enwech nemen laten unde wo gy hyr wylen by ghedan heben, dat scrivet my myt den ersten, dat gy konen. Unde so schole gy weten, dat ik tomalen groten undank juwen broder[1] darumme dat ik Hanseken und Hylebrande oven en sande to sunte Mychel, dat hebbe ik ghelaten umme juwen wylen, also gy my ghescreven hadden, wente do syn swagher do quam ut Lyfflande, do vornyden se myn untuke upe nyghe, do scholde ik do oversenden Greteken unde Anneken.
Item, des en hebbe ik mynen wylen noch to der tyd, wente ik sede em also vor, dat gy my ghescreven hadden, do seden se my wedder, gy weren also fele also unmundych, wente en wosten nycht wat gy scriven, unde ik scholde my nycht rychten na juwen screven, men ik scholde don na erem rade. Wolde ik des nycht don to tyden, so mochte ik et don to undtyden unde also ik et gherne don wolde, so scholde et to spade wesen. Unde aldus so moghe gy merken, wo troslych dat my unse vrunt syn unde hadde ik eren rad gedan, so hadde ik rede langhe in Lyfflande ghewesen myt unsen kynderen, men des en wylle ik nicht do unde ik en wyle ju nycht overgheven, derwyle dat ik leve, oft God wyl. Unde ik hope is et nu aldus, God de wyl et noch anders foghen unde ok so hebbe ik vorstan, dat gy nu en nyghe recht angheslaghen. God helpe juwes rechtes enen goden ende unde God gheve, dat Bokel dar jo kome, also he my ghelovet hadde. Wente do he hyr was, do koffte he my doch enen ossen unde 2 swyne unde nu en hebbe ik numende, de my enen schap koft unde aldus en hebe ik noch altos nychts. Unse leve God, de berade my. Anders nycht op desse tyd, men God de beholde juwe sunt. Ghescreven in sunte Anderwes avent.
Item so sende ik Joste synnen krone brief(!) bi Unrowen de loper. Unde Hylbrant, leve man, weten schole gy, dat ik byn to hus in Everd Junghen hove, dar he ik en schouen sal my 3 boven unde myt 3 schorsten. Unde de kyndere synt al gesunt unde ale vrunt van der gnade Godes. Unde dot wol unde scrivet my, wat de warwe kostet heft, so mach ik se vorkopen
367. Hildebrand Veckinchusen in Brügge an seine Frau Margarethe in Lübeck. – 1423 Dezbr. 19.
- Rev. St.-A. Orig. Pap. mit den Resten des Secrets: An Margreten Veckinchusen to Lubeke lyttera detur.
In den namen uns heren. Leyve wyf, dy gheleyve to weten, dat ick dynen breyff op sunte Andres avent[2] wol vorstan hebbe; men vint nu so
Wilhelm Stieda (Hrsg.): Briefwechsel Hildebrand Veckinchusen. S. Hirzel, Leipzig 1921, Seite 385. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Briefwechsel_Hildebrand_Veckinchusen_385.jpg&oldid=- (Version vom 31.7.2018)
