|
Wilhelm Stieda (Hrsg.): Briefwechsel Hildebrand Veckinchusen |
|
|
252. Hildebrand Veckinchusen in Brügge an seine Frau Margarethe in Lübeck. – 1420 Septbr. 29.
- Rev. St.-A. Orig. mit den Resten des Sekrets. Adr.: An
Margreten Veckinchusen to Lubeke lyttera detur.
In den namen uns heren. Leyve wyf, ick do dy to weten also van myr dochter Talleken, dey ghelach van erem neghende kinde op sunte Maryen Maddelenen dach[1], God sy ghelovet, dat sey des kindes ghenas unde dat kint es ghesunt unde Talleken es in kranken punten, God bettert. Sey es plat ledewys worden, men moyt sey hantteren also 1 junck kint; nu man noch wyf noch mester noch frode frouwe alle, dey in Brugge mochten sin, einseghen noch horden nu des ghelykens also Talleken daran es, God moyte beteren myt uns altomalen. Aldus es Peter in groter rouwe unde drucke, hey hevet mer myt er to donde, dan myt allen synen 6 kinderen, dey noch levendych sin. So ick sey sey unde ander lude mede, so einstet gheyn rat met alle to Talleken myt alle nicht. God geve, dat uns allen salych sin moyte; unde ok so ghevet Talleken umme gheyn dont nicht ok vraghet sey nerghen na. Som lude wellen segghen dey poppelsye hebbe sey gheroyt. God van hemelryke moyte uns allen bewaren vor solke sucke unde vor alle quade. Dyt befelle ick den almechtyghen Gode, dat sey unde wy alle ghesunt moyten werden an seylle unde lyve, amen.
Item leyve wyf, so wete dat ick to Brugge bin wedder van Andorpe komen. Ick hadde mynem broder van velle saken screven to Frankenforde, dar ick noch gheyn bescheyt van em hebbe, dar my wol macht an es. Ick hedde myn broder wol hir ghehat, my duncket, hey ghevet cleyne umme my noch umme uns alle; mer God salt ofte God wyl noch alto mallen wol beteren.
Item so hebbe wy noch 1 ₰ nicht van den keysser, ok wete wy nicht woy wy faren sollen, mer doch so hoppen wy, dat wy nicht myssen[2] sollen, wy sollen wol betalt syn myt allen kosten unde schaden, wy komen so jammerlyken to alse 6 lude(!). God vorsette uns allen unsen schaden. Her Godeke Fysan es noch by den keyser unde darto so sanden wy nu even boden by em umme to achter volghen unse ghelt. Ick solde ghernne myn part van den ghelde hebben, er ick van hir toghe. Anders so einweyt ick dy nu wat mer scryven op desse tyt, mer ic sal dy noch in kort allen mynen wyllen scryven. My hevet wunder, dat Hoyman my nicht einscrivet.
Item so hebbe ick vorstan woy dat myn broder to Lunenborch int marcket wyl sin. Wat dar af schut, des werde wy ghewar. God geve myt leyve amen darto komen. Hirmede so moyte dy God bewaren alle myt allen unsen kinderen unde alle unsse vrent. Ghescreven op sunte Mychels dach in Brugge 1420.
Item so sende ick dy to Hamborch wort 1 cleyne halve tunne, dar es
: Briefwechsel Hildebrand Veckinchusen. Leipzig: S. Hirzel, 1921, Seite 155. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Briefwechsel_Hildebrand_Veckinchusen_278.jpg&oldid=- (Version vom 31.7.2018)
