|
Wilhelm Stieda (Hrsg.): Briefwechsel Hildebrand Veckinchusen |
|
|
vorfuelt es myt alle unde ofte er mer es dar mank, des wet ik nicht unde ik sprak Smede darumme, wo he et alzo vorwart were, do segede he my, dat et tuesschen Bruegge unde Slues geschein were in der polleyten, dar were vele waters innen gewesen. Item de komel es noch al unvorkoft, der vyyen es noch by 50 korven unvorkoft, dat es tomale snode guet, de lude wellen er nicht kopen, ik wil dar gerne des besten by doen suender vele scryvensch myt huelppe unde rade Hinryk Garnevelde. Item so dencke ik jue noch wat mer to senden in kort to Lubeke wart. Item de Herentalche hebbe ik vorkoft, dat stuecke vor 23 mark, 10 scot. op pingesten[1] to betalen. Hir es neine bate an laken ut Flanderen. Anders nicht den Got sy myt jue. Gescreven des anderen vrydages na paschen 1417.
Item leve Hildebrant, ik kan jue to desser tyt keine rekenscop scryven. Hirnest, ofte Got wil, so wil ic jue wol scryven to Lubeke to ofte Got (wil). Ok so wete gi wol, wat gi my gesant hebben unde ik jue wedder; ik en wel myn provit myt juewen gelde hir nicht doen; alzo et my van den luden wert, alzo wil ic et jue beweren unde senden jue wedder. Hir es to male quat gelt to krygen van den lueden unde hir es queade beweringe. Got geve, dat et in kort beter mote werden. Item alzo gi my scryven, dat ik jue scryven sole wat gi my solen senden van laken, ut Brueger marte, des en kan ik jue nicht gescryven, wente ik en wet nicht, wo et noch werden wel myt den orloge. Wy hopen et sole vrede werden, ok besorge wy uns vor orloge. Item na dem komel vraget neimant; unde hir sint lude, geven eren rys vor 20 schot. unde wan ik juewen rys darvor geve, so solde gi nicht 8 mark krygen vort ℔ gr. Dat duencket my quade kopenscop sin. Ik en kan neine bate kennen tuesschen dyt unde Flanderen.
150. Gerwin Marschede (in Danzig) an Hildebrand Veckinchusen in Brügge. – 1417 April 23.
- Rev. St.-A. Orig. Adr.:
An den erbaren man Hildebrand Veckinchuesen to Bruegge littera detur.
Vrentlike grote vorgescreven. Wetet, Hildebrant, gude vruent, dat ik jue sende in Hanneken Troste 12 tunnen 1 mese, darinne 50 sentener koppers. Darvor sol de schipper hebben to vracht 13 sl. grote. Den kinderen gaff ick to winegelde 5 sl.
Item so sende ik ju in Albrechte van Borken 3 stro wasses.
Item in Albrecht Ludekensone 1 stro wasses unde in mynes broders tunne 2000 Lettouwessches werkes unde 1 stuecke sulvere 1 kannepueas 1 line; wat dyt dink stet, dat vinde gy wol in anderen breyven. Got geve beholden reyse, amen. Got late jue gesuent lange myt leive. Gescreven des anderen vrydages na paschen 1400 int 17 jar.
- ↑ 30. Mai.
: Briefwechsel Hildebrand Veckinchusen. Leipzig: S. Hirzel, 1921, Seite 99. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Briefwechsel_Hildebrand_Veckinchusen_170.jpg&oldid=- (Version vom 31.7.2018)
