Seite:Briefwechsel Hildebrand Veckinchusen 163.jpg

	Wilhelm Stieda (Hrsg.): Briefwechsel Hildebrand Veckinchusen

kan unde vortan by den anderen dingen ny ju^ewen breyven, so ik allerbeste kan, dar ik es macht hebbe. Anders nicht, den Got sy myt ju^e. Gescreven 2 dage na sunte Pauwels dage vor lychtmisse int jar 1417.

Gerwin Marschede.

Garnevelt es wol hirkomen.

143. Tideman Brekelvelde (in Lübeck) an Hildebrand Veckinchusen in Brügge. – 1417 Februar 2, mit Nachschrift vom folgenden Tage.

Rev. St.-A. Orig. Adr.: An Hildebrand Veckinchusen to Brugge littera detur. In dorso von der Hand des Empfängers: 1417, 21 in feberwarjo.

Vruntlike grote tovorne^{[WS 1]} screven. Wetet, Hildebrant, dat ik juwen breff, ghescreven 16 die in januario, wol vornomen hebbe unde, alse ik vorneme, so hebbe gy de syde ghekofft dar gy my ene haspe van sanden by Hermanne deme lopere unde gy scriven, dat er wesen sal in al 59½ ℔, dat ℔ hebbe gy ghekofft ume 13 sl. grote. Hildebrant, dit ghelevet my wol, doch so iz et to vele gheldes, kunde gy nu op en sorte komen van 10 sl. grote off darby, dat wy de ene by der andern hebben mochten. Hir mote gy op vordacht sin, wante en deels vrowen en wellen nicht gerne hogher ghan dan 4½ mark et ℔. Darume so moeste wy ok ander syde darto hebben. Item, Hildebrant, ik bidde ju, dat gy wol don unde scriven my nu rekenscop van der syde, also van dessen 59½ ℔, de gy nu ghekofft hebben unde ik van der syde, de gy uns tovorne sanden unde rekent dar entheghen wovele dat uns van deme kopper gheworden is unde vort wes gy van unser wegene noch hebben unde scrivet my ok wanner dat men desse 59½ ℔ syden betalen sal unde maket all dink clar, des bidde ik ju. Ik wel ju binnen kort scriven, wovele gheldes dat wy hir in al hebben solen, op dat wy al betalt werden.

Item so hebbe ik wol vornomen, dat gy uns senden by enen boden gheheten Seghebode, 13 ℔ syden, alse van den 59½ ℔. Got geve, dat he mit leve komen mote.

Item alse gy my ghescreven hebben van den 32 ℔ groten, de ik hir toseggen sal to betalene 8 daghe na paschen^[1], dit hebbe ik den luden toghesecht. Mer ik hope to Gode, dat gy desulven hir betalen solen, wante hir sin lude, den tomale sere vorlanghet.

Item my vordrut tomale sere, dat gy de 25 ℔ grote so lancksem beweren: ik mo^et dar mede liden. Item Diderik Grile was hir unde he is weder enwech ghereden unde he lovede my, dat he binnen kort weder komen wolde. Unde wovele dat he my in al schuldich is unde darvan geven hevet, dat hebbe ik ju alrede in andern breven screven.

Item alse dat gheleyde van hir ghet, so wel ik de tunne werkes mede oplegghen. Iz et ok, dat her wat komet ut Prutzen, alse gy screven hebben, dat wel ik ju ok senden. Hirmede blivet ghesunt. Ghescreven op unser vrowen dach purificacio anno 17.

Tijdeman Brekelvelde.

---

1. 18. April.

Anmerkungen (Wikisource)

1. Vorlage: tovornv

Empfohlene Zitierweise:
: Briefwechsel Hildebrand Veckinchusen. Leipzig: S. Hirzel, 1921, Seite 92. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Briefwechsel_Hildebrand_Veckinchusen_163.jpg&oldid=- (Version vom 31.7.2018)