|
Wilhelm Stieda (Hrsg.): Briefwechsel Hildebrand Veckinchusen |
|
|
5 gr. Dyt ghelt mochte wol gherentet hebben by 17 jaren wol 41 ℔ 7 sl. 9 gr. Dyt es tohope 86 ℔ 7 sl. 2 gr. Were my dyt ghelt do gheworden, so were gy des do untslaghen wessen, so einkonde ick ju nicht eschen. Das so meynne ick dyt ghelt to hebben unde dar aftoslande.
Item vrouwe unde swagher so gheleyve ju vort to weten, er ick jawort wolde gheven to juwer dochter to trouwen, do welde ick ein hus hat hebben, myt mer worden, do wort my toghezeghet to gheven van myns heren weghen, des God ghenedych sy, ½ last wasses. Darop vorantworde ick wedder do sulves efte ick 1 hus solde kopen myt ½ last wasses; ick wolde an gheyne sake, er ick 1 hus hedde. Do wort my toghezegget aldus, dat ick dey ½ last wasses annemen solde op ein beteren van mynen heren. Das annemmede ick dey ½ last wasses op ein vorbeteren van mynem heren, wan ick ein hus kofte. Aldus so rekenne ic 40 ℔ gr. vor dey ½ last wasses unde ick hope unde meynne, vrouwe unde swagher, dat gy my dey vorbeterynghe wol don sollen. Aldus so late ick dey vorbeteringhe op ju beyden stan.
Item vrouwe unde swagher, so gheleyve ju vort to weten also umme dey crone, dey Greteke op er hovet hade, do ick sey trouwe to wyve in den namen Godes unde myt anderen dyngen, dey er einbreket, also sey ju dat wol sal to kennen geven myt scryf ofte myt munde efte sick dat also vellet, darvor rekenne ick 30 ℔ gr. Unde weret sake, dat mynem wyve Greteken dey crone also gheantwort wert myt alle ander dynghe also darto behoren mach, also dat alle dynch so volentoghen wert, also my ghelovet wort, dar ick juwe dochter op trouwede, so est recht unde wyl ju van dey 30 ℔ gr. wedder gheven, also dat recht unde moghelyk es.
Item so es dey summe tohope alse vorscreven es, dat my ghebort van ju 189 ℔ 13 sl. 10 gr. Hir afnommen dat ick sy also vorscreven es also dey 123 ℔ 12 sl. 1 est. Aldus so solde gy my hir schuldych blyven, dar ick recht to hebbe, also ick des hope to Gode 66 ℔ 21 gr. 2 est. Vrouwe unde swagher, so doyt wol unde latet my weten, wor gy my dyt ghelt betalen, wante ick ein welles nicht unberen.
Item vrouwe unde swagher na deme male, dat gy to der Ryghe vor deme rade wessen hebben to twen tyden myt juwen vrenden unde hebben dar breyve an den kopman hir nomen unde an my, so wat dey breyve innehebben, dat vindet syk wol, also dat tyt wert. Hirumme vrouwe unde swagher, so beghere ick van ju beyden, dat gy myt juwen vrenden to der Ryghe vor den rat gan unde vorlaten my aller sake dar gy my unde sey umme screven an den kopman hir, also dat sey my underwyssen solden, dat ick juwe gud solde senden wedder to der hant unde des ghelykens, so beghere ick, dat gy ok breyve an den kopman hersenden, also dat gy my allersake vorlaten, dar gy den kopman umme screven hadden my to underwyssende myt mer worden, also dat my hir vor den kopman unde der stat Ryghe op deme rathuse so velle ere wedderschey, also my achterdel scheyn es. Gy hebben my in der lude clappen bracht to der Ryghe unde hir unde ok anderswor, dat ju van rechte nicht ein to behorde. Hedden gy recht bedacht ghewesen, hedden gy desse sake an ein anderen gheseyn, dey my dus handelen wolden ghehandelt hebben, also gy ghedan hebben, gy solden dat ghekert hebben
: Briefwechsel Hildebrand Veckinchusen. Leipzig: S. Hirzel, 1921, Seite 57. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Briefwechsel_Hildebrand_Veckinchusen_128.jpg&oldid=- (Version vom 31.7.2018)
