|
Wilhelm Stieda (Hrsg.): Briefwechsel Hildebrand Veckinchusen |
|
|
gheleyve to weten, also ju wol vordenken mach, do ghy hir weren, also ic myt ju sprack also dat ick schellinge unde ghebrek hadde, also dat ic mochte esschen sin myner vrouwen ut den namen mynes heren Enghelbrachtes Wytten, des God ghenedych sin moyte unde alle zeylle, amen. Dat ghebrek unde schelinghe hebbe ic myner vrouwen nu al ghescreven unde hadde altos eins gudes antwordes verhopet van er, des ic nu kryghen konde van er noch van erem sonne Einghelbrachtes myns swaghers. Nu hebbe ic enen breyf van der stat van der Ryghe, woy dat myn vrouwe Einghelbrachtes Wytten wedewe unde myn swagher Einghelbracht myt eren vrenden vor deme rade to Ryghe hebben wessen unde hebben gheclaghet woy ic er gud vor untholde vor pandinghe. Na dessen donde unde claghe, so dunket my wol, dat dey vrentschap harde cleynne es, des ic nicht ghehopet hadde; dat were mer vrentschap ghewesen, hedde dyt ein ander don wolt dus danne clachte op my, dar solden sey van rechtes weghen vorhebben wesen myt er macht. Nu dunket my, sey wellen deyghenen syn, dey my myt wyve unde kinderen vorderven solden, weret in er macht unde hope to Gode, sey solen my noch so velle ere don vor deme rade van der Ryghe also sey my schande dan hebben. Hirvan dessem donde, so gheve ic ju beyden to kenen myn ghebreke dat ic hebbe op mynne vrouwen.
Int erste so was my toghezeghet myt mynem wyve 100 marc Ryghes, er ennych dinch volgheynch. Dey 100 marc Ryghes hebbe ic mannych worf hesschet, sey mochten my nu werden, Gode syt gheclaghet. Dey 100 marc weren in den tyden wert 127 Einghelssche nobbelen, dey synt nu wert hir in Brugghe 43 ℔ 19 sl. 7 gr. Dyt ghelt solde van rechte rentet hebben desse 14 jar lanch 112½ Einghelsche nobbelen unde ok, dat dey rente nicht betalt es ghewest das langhe to desser tyt to dar mach opkomen ok van rente 22½ nobbel. Aldus solde dyt sin tohope 262 nobbelen Einghelsch. Dyt maket myt punt groten talle op desse tyt 86 ℔ 7 sl. 2 gr. Stet dat lengher, dat sal mer sin unde werden, hedde my desse 100 marc worden, so dorfte ic sey nu nicht esschen.
Item na deme dat myn here my vorgheten hevet myt wyve unde kinderen sunder myn dochter Trudeken myt den 100 marc Ryghes in synem tesstemente, darinne sy ick nicht ghefraghet na deme dat Greteken tovorn in den ersten tesstemente bedacht was myt 100 ℔ gr. also ic meyne. Ic hebbe myns heren gud aldus langhe ghehantyrt, dar hey enen vrommeden solde wol van …[1] geven hebben 40 ℔ gr. Desse 40 ℔ gr. meyne ic to hebben na deme dat et myner vrouwe …[1] aldus myt my an beghint to slande. Dyt es dat ander punt.
Item dey 100 marc, dey Trudeken gheven sint in den lesten tesstemente, dey rekenne ic op 33 ℔ 6 sl. 8 gr. Dyt es dat dorde punt.
Item dat verde punt es also. Myn swagher, her Kort Vysch wol vordenken mach, dat my myn here lovede ½ last wasses to helpe enem
: Briefwechsel Hildebrand Veckinchusen. Leipzig: S. Hirzel, 1921, Seite 40. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Briefwechsel_Hildebrand_Veckinchusen_111.jpg&oldid=- (Version vom 31.7.2018)
