Seite:Briefwechsel Hildebrand Veckinchusen 102.jpg

Fertig. Dieser Text wurde zweimal anhand der Quelle korrekturgelesen. Die Schreibweise folgt dem Originaltext.

	Wilhelm Stieda (Hrsg.): Briefwechsel Hildebrand Veckinchusen

Ausstellers, H. V. zurückkehrten. Die hier abgedruckten Blätter sind nicht unterschrieben, doch ist die Handschrift Sivert Veck.’s unverkennbar. Am Fusse des ersten Blattes hat H. Veck.’s Hand hinzugefügt:

Item so solde ick van den wasghelde weddernomen hebben 13 gulden 12½ wytten ₰, des es noch nicht ghescheyn. Arnt Wachendorp solde op synre helfte betalen 18 sl. 15 gr. ofte 6½ gulden unde 6 wyte ₰ 1 osten.

Broderlyke leyve vorscreven. Ic bydde ju dat gy geven Peter Blyterswyck 400 gulden cronen, der sal Hans Losekync utgeven 160 cronen vor 200 gulden dey syn broder Hynric hyr opnomen hevet, dey Hans to Lubeke ward overkopen sal op syn broder.

Item hevet my Hans van Mynden screven, dat ic 180 gulden op ene overkopen sole, dey hebbe ic gherekent op 128 cronen, dey nemet op Hans van Mynden und op Tydeman Brekelvelden met den eyrsten dat sal wol betalt werden.

Item gy solen op dat was gelt utgeven op dat was 112 cronen, dyt es tohope 400 cronen, dey betalt in Bru^oggermard to dancke.

Item so wetet, leyve broder, dat ic noch opnomen hebbe van Johan Wapenmaker van Mechelen 100 gulden, darvor gevet eme op dat was gelt 80 cronen. Aldus hebbe ic op al dat was betalt vor dey 15 stu^ocke und vor ungelt, 780 gulden und 12½ wyt ₰ Kolsch. Dartegen hebbe ic untfangen int erste 42½ ℔ gr. vor elk 33 gr. 1 Rynsch gulden, summa to gulden rekent 309 gulden myn 3 gr. Item Arnd Wachendorp hevet utgeven 30 ℔ gr. vor elk 33 gr. 1 Rynsch gulden, summa to gulden rekent 218 gulden und 6 gr. und gy solen nu geven vor 100 gulden 80 cronen Johan Wapenmaker; noch sole gy geven vor 140 gulden 112 cronen, dyt es overal dat ic op dey vorscreven 780 gulden 12½ wyt ₰ untfangen hebbe an den vorscreven 4 porselen – 767 gulden. Aldus unbreket my van dessen wasse van deme ic utgeven hebbe 13 gulden und 12½ wyt ₰. Desse vorscreven 13 gulden scryvet ju to van den wasgelde op dat brysylyenholt, op dat dyt wasgelt slecht werde van deme, dat ic hyr utgeven hebbe. Wan gy al dyt wasgelt betalt hebben also vorscreven es, wat dan mer van al dessen wasse werd, darmede sole wy hyr in der andern mysse 1600 gulden betalen. Got geve dat wy to gelde mede komen moten, ic wel to Kolnne met Arnd Wachendorppe spreken, woe hey dat met syne helfte holden welle, hey wel syn del nicht to der see ward hebben, my duchte best dat was vorkoft met den eyrsten und elk met syner helfte geldes syn beste provede.

Item ic sy met Arnde Wachendorp eyns, dat gy al dat was vorkopen und nemen unse helfte geldes to ju und doet unse profyt mede welken wech ju best duncket und holdet eme syn helfte geldes, wand hey ju synen wyllen scryvet, wat gy darmede doen solen. Ic hope nummer, dat wy also vele vorleysen solen also gy scryven, doch woe deme es al dync es int beste scheyn, dencket dat wy den schaden met deme gelde nakomen, dat sy to Pru^osen ofte to Lyflande ward, welk ju best duncket.

Empfohlene Zitierweise:
: Briefwechsel Hildebrand Veckinchusen. Leipzig: S. Hirzel, 1921, Seite 31. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Briefwechsel_Hildebrand_Veckinchusen_102.jpg&oldid=- (Version vom 31.7.2018)