|
Wilhelm Stieda (Hrsg.): Briefwechsel Hildebrand Veckinchusen |
|
|
Item ic hebbe den las untfangen, Got dancke Tomas. Item Tomas mot syn gelt hebben, Got rade, war men dat nemen sal.
Item dat Reynolt Swartte 10 scheppunt wasses vorlorn hevet, Gode unbarmet, dat wy al umme schaden nemen, dat were tyt, dat ok dey wynynge queme, dat es drade 6 jar al vorlus ghewesen un dat dey Swartten unmogelyc dync begern, dat wel ic nicht overgeven, ic meynde sey mochten uns wol dancken, dat wy wol by en allen daen hedden. Gevet darane nicht over, ic wetet dan mede, ic meyne sey hebben alle unse gelt und al dat profyt, dat sey alle daen hebben ofte noch doen dat sy unse half und dat sey ok nicht van uns scheden solen, deywyle sey eymandes gelt of selscop hebben wellen hebben, ic hebbe lange tyt wol sorge had, dat sey uns abe solden staen, wan sey ut deme drecke wern komen und sey bet doen kuonden, scryvet my er begerynge darna wel ic ju dan scryven.
Item sy ic eyn …[1] der Venedyesschen selscop, woet darumme es, dat sal syk wol vynden, doe dey heldfte wunnen was over 4 jarn doe wolden ander lude den danc hebben. Hedde uns dey bosewycht recht daen, so hedde wy bet daen dan met der Nowerschen reyse, ic vorneme neyn grot gud, dat wy in 5 jarn wunnen hebben an der Nowerschen reyse, aldync es int beste scheyn, ander lude hebben ok schult.
Item ic wet neyn unvruntschap met Slyper; hey hevet der jungen ghesellen 4 to syk, dey vore in unser selscop wern und by der selscop ok opkomen syn und dey voren syn gud tuoschen Lubeke und Kolnen und solen gudes noch wynnen al ander dync hevet hey overgeven, hey wet wol to doende, al scryvet hey ju nicht vele over, kunde wy ok profyt doen des were uns wol noet, ic sy hyr vele schuldych und hebbe in 5 jarn neyn profyt daen, men ic moet alle jar wol 50 gulden to woeker geven sol ic tergelt hebben, ic moet dat op schaden nemen. Got helppe my ut dessen noeden, ic hebbet ju vele scryven, ic sy mer dan 500 gulden tachter und gaen alle jar tachter wat ic vortere, und wynne nicht und doe ok neyne kopenscop met alle; ic hebbe in der selscop bysunder 1500 marc Lub. boven dat gelt, dat ic und gy darinne hebben, kunde uns wat weder werden, so wer et gud. Got geve uns to Luonenborch eynen guden eynde, so mochtet noch al gud werden, wat helppet vele scryvens, elk doe dat beste in allen dyngen und scryvet my rekenscop to eynen eynde und beydet over my. Ghescreven op der hyllegen 11000 megede dach 1412 jar.
Item Hans Bentsem hevet my hosen und wand int hus brocht, ic welt vorkopen, so ic eyrst kan und schycken eme dat gelt, dar sal crancke wynnynge ane wesen, also my Slypers knecht seget, ic welt beste doen, dyt segget juwen knechte.
Item my banget sere na unser rekenscop eyn eynde to hebben und al were ic by ju, so moste gy my doch al dync in scryft geven und ic ju weder, dat moste elk doch koregeyrn und overseyn. Schelt ju icht an myner
- ↑ verwischt.
: Briefwechsel Hildebrand Veckinchusen. Leipzig: S. Hirzel, 1921, Seite 28. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Briefwechsel_Hildebrand_Veckinchusen_099.jpg&oldid=- (Version vom 31.7.2018)
