|
Wilhelm Stieda (Hrsg.): Briefwechsel Hildebrand Veckinchusen |
|
|
hyr ok were, so hedde ic hyr also vele dey beter doen. Dey hyr 2 ballen sardoke sal hebben to borge, dey mot borgen setten alswoe eyn es. Ic wolde to Lubeke bet 6000 marc hebben borget dan hyr 600 gulden. God betert al umme. Item ic kan nicht by ju komen van dessen wyntter, ic hebbe in eynem jare nicht 18 weken to hus wesen umme der selscop wyllen. Ic moet tegen Kerstmysse[1] to Luonenborch syn, darumme denchet nicht, dat ic dar kome und scryvet my al rekenschop. Est dat ic ergen an unrecht screven hebbe, dat wel ic gerne aflaten, wan ic ju rekenscop hebbe. Er kan ic neyn dync clar maken. Hevet Hans van Mynden icht vor my utgeven van unser selscop gelde, dat es recht, dat ic weder in krege, ic wel, ef Got wel, nicht 1 ₰, dar ic neyn recht to hebbe, ic hebbe ju screven, wat ic untfangen und weder utgeven hebbe. Also scryvet my ok weder, wey dan mest untfangen hevet, dey gevet weder ut. Vorscryven es neyn betalynge, wan gy my clar rekenscop screven hebben, untfangen und utgeven, so scryvet unser eyn deme andern syn ghebrek wol. Ic kome dar nicht van dessen wyntter. Item my es let, dat gy an Kornelys also vele leget hebben, hey hadde cleder noch ic wel neyn gelt mer an ene leggen, hey mot syk by vromeden luden vorsoken. Kunde hey men scryven.
Item ic wel Hoesteyne mynen wyllen scryven. Doet dat beste na synen breyven. Ic meyne hey sole tegen vorjarn overkomen, Got geve beholden vard al umme. Item ic hebbe in rekenscop van den brysylyenholtte und den wasse screven und hebbe hyr betalt 300 myn 5½ gulden und gy 400 cronen; rekent wat an den wasse vorlorn es, dat kopet half op my hyr to Kolnen, dat wel ic betalen, so est dat slecht und darf in der rekenscop nicht komen.
Item dey 25½ ℔ gr. und dey 6 marc und 6 sl., dey darop to schaden syn komen, dey nemet vrylyken op to Lubeke ward op Tydeman und Hans van Mynden, dey komen der selschaft to und sole ut der selscop gelde betalt werden, dey solen wol betalt werden und nicht weder op ju overkomen. Ic hebbet en also to Lubeke screven, dat sey des neyn danc solen hebben, darmede sy ic des untslagen also ic meyne. Item also gy meynen 40 ℔ gr. to Lubeke overtokopen, dat latet bestaen, ic welt to Lubeke scryven dat sey ju wederscryven solen wat sey vor my utgeven kunnen. Ic hadde nu eynen breyf van Lubeke, my schuot nergen neyn truowe; men es my to Lubeke schuldych by 500 marc, my es 1 ₰ nicht inkomen. Ic hadde ok hopet, dey selscop solde my 700 marc ut der selscop vorut geven hebben, nu scryven sey, sey hebben neyn gelt und kunnen my nicht geven und wysen my al, dat gy vele geldes van der selscop inne hebben.
Item scryvet my van Tüten und allen andern dyngen beschet ofte gy wellen doch hedde wy unse rekenscop slecht, so worde dat wol slecht.
Dat moet met den Lubeschen anders werden bynnen kord, dat mot vorbeydet syn. Got voget to den besten to ewycheyt, dat wel en ovel gaen, dyt holdet hemelyc, also ic love bynnen dessen jare mach vele scheyn.
- ↑ 25. Dezbr.
: Briefwechsel Hildebrand Veckinchusen. Leipzig: S. Hirzel, 1921, Seite 27. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Briefwechsel_Hildebrand_Veckinchusen_098.jpg&oldid=- (Version vom 31.7.2018)
