Seite:Briefwechsel Hildebrand Veckinchusen 072.jpg

Fertig. Dieser Text wurde zweimal anhand der Quelle korrekturgelesen. Die Schreibweise folgt dem Originaltext.

	Wilhelm Stieda (Hrsg.): Briefwechsel Hildebrand Veckinchusen

dey rekenscop annemen, dar wy dey leyten, doe ic lest by ju was und doe al unse dync slecht makeden to eynem gantsen eynde, des es ummer nicht lanc al dat send. Handelt es van uns beyden dat es gud to vynden, wan elk syne breyve und scryft oversu^ot. Ic sande ju eyne rekenscop van deme Sunde, wan gy dey allene hedden, so were vele dynges neyn noet, doch wy wellent al wol vynden, ef Got wel, vorrekent were neyne quytscheldynge unser neyn begert anders dan recht ok schelt my dar nicht ane woe gy juwe rekenscop slu^oten, schelt my dan icht darane, dat wel ic ju wol scryven, also doet gy my ok al in broderlyker leyve und tru^owe, my were wol also leyf dat wy al unse dync slecht hedden also ju umme vele sake wyllen, wy syn alle sterflyc. Item dat ic ju schuldych sy van allen lesten porsselen 28 ℔ 13 sl. gr., dat wel ic al wol vast scryven und noget my wol ane.

Item gy scryven van deme gelde van Tomas Veckynchusen und van deme gelde van Boden van Stockam, dyt es al in unse selscop komen, darumme duncket my best, dat gy dat ut unser selscop weder betalen und dat darane doet reken dat maket dey slechteste rekenscop.

Item ic hebbe eyn del ghetekent op juwe rekenscop, dat in dey rekenscop deyet van der selscop wegen. Item an den ryse ward vorlorn und nicht wunnen, ic hadd en mestlyc to Francvord in dey mysse und kundes nicht quyt werden und nam sedever daran eyn del, ic wolde dat ic dat gelt over eynem jare al weder hadde, ic wel ju neyn vorlus reken, darmede es dat slecht.

Item ic sy in Tyten und unse selscop noch schuldych 47 marc und 11½ sl. Lub., dat schycket en also gy eyrst kunnen, also hebbe ic vor dat gelt to mynen dele to reyntte geven 25 marc myn 1 ferd Ryges van 4 jar reyntte also vele sole gy ok utgeven, so hevet elk van uns allen 100 marc Ryges vorreynttet 4 jar lanc, dyt scryvet und schycket dat dyt wol vorward werde. Aldus hebben 25 marc Ryges op myn del utleget, sal darane vorlorn syn, dat es ummer wynderlyc, wand dey selscop hevet ummer beholden vard ghevard sunder schaden grot hebbe lof, darumme est noet, dat men dar beschet van wete ic wel van den mynen wol rekenscop doen, wan men wel wat ic des under harden hot hebbe, latet ju rekenscop doen dey der selscop gud under hod hebben.

Item gy scryven dat na som lude scryven solde dey helfte komen syn an der selscop dat geve Got, doch ic hope wy solen ummer bet mede varn dan met der Nouwerschen reyse my were noch leyt, dat wy in desse selscop nicht unse gelt nicht gheleget hedden. Got beward vordan und dat uns van al umme gude rekenscop komen mote, darna moge wy dan sey wat elk doen wel. Gy scryven an der Nowerschen reyse sole nu gelt staen to wynnen umme des wyllen, dat dey borch of es, men sal bynnen 1 jare wol vornemen, woe dat varn sal dar bynnen mach men ok seyn woet met der selscop gaen wel, darna komet dan dach und rat, Got geve met leyve to leven.

Item also gy scryven ic sole ju besorgen, dat ju wat vor ju arbeyt werde, dat wel ic to male gernne, woe gy dat uterlyken scryven wellen

Empfohlene Zitierweise:
: Briefwechsel Hildebrand Veckinchusen. Leipzig: S. Hirzel, 1921, Seite 1. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Briefwechsel_Hildebrand_Veckinchusen_072.jpg&oldid=- (Version vom 31.7.2018)