dar hey nicht neyn to sal seggen, hey scref my, dat hey my schuldych bleve 60 marc myn 2 sl. Lub. des hevet hey seder van mynen wegen untfangen vor 4 balle sardoke by 430 marc Lub. und mer.
Item van Hynric Losekynge hevet hey opbord 130 marc lub. reyde gelt und hey hevet van andern dyngen opbord ok mer dan 100 marc Lub., darto hevet hey van Boden wegen opbord 264½ marc Lub.
Van al dessen gelde solde hey ju toscryven dat gelt van deme naten terlync wandes 210 marc und van Scryvers wegen 275 marc Lub. und van Boden wegen dey vorscreven 264½ marc, aldus est, dar hey ju toscryven solde overal 750 marc myn 8 sl. Lub.
Aldus steyt unse rekenscop tuoschen eme und my wan hey ju desse 750 marc myn 8 sl. toscryvet und vor ju utgevet, so sal ic eme nicht schuldych boven 150 marc Lub., wand hey hevet noch vor my utgeven 216 marc Lub., dar hebbe ic eme tegen screven, also vele geldes to nemen van mynen schulden ofte op mynen schaden. Aldus sal men desse rekenscop in der warheyt vynden, ef Got wel und hey hevet my altyt screven, hey wolde gerne betalen, wat gy op en overkoften, men my duncket dey love und truowe sy ute; wey deme andern gud doet, dey doet eme nummer gud weder, doch wet ic wol hedde gy dat gelt opnomen in rechter wessele, dat hedde wol betalt worden, dat wet ic wol, men hey es van der selscop wegen also vele schuldych, dat hey ju und my ghetogert hevet dar ic to male sere umme moeget sy und hebbet eme ok wol hartlyken ghescreven also dat ic ju noch bydde dat gy opnemen dy vorscreven gelt dey 750 marc myn 8 sl. Lub. op myn eventuore, werd dat nicht betalt, ic wel den schaden hebben, sorget nicht dat komet nicht weder over, dat wet ic wol, ic hebbe darnu alsolke breyve henne screven, dat et wol betalt sal werden, ef Got wel. Ok hebbe ic Boden alsolke breyve screven, dat gy des ok wol eyn eynde krygen, ef Got wel. Ic was Scryver schuldych 275 marc und gy scryven Reynolt sole eme vor 210 marc 96 marc Ryges ofte nobelen geven. Wes gy dar ane doen, dat es my leyf, my es let dat hey lange syn gelt nicht ghehat hevet; wordet eme van Reynolde nicht, so wolde ic wol dat gy eme guden kop laken over wyntter mede koften. In al ramet des besten und beydet over my. Ghescreven 2 dage vor sunte Mertyne 1410 jar.
Item umme dat gelt, dat Steynhus gerne van der selscap wegen, dar hevet my Steynhus vele umme screven, dat hey gelt in Lyflande van der selscap wegen vorborget hedde, werde eme dat nicht van der schult, so moste eme dey selscap den schaden oprychten, also duncket my dat wy dey helfte van deme, dat hey tachter es, betalen moten und sey beyde broder dey ander helfte betalen moten, dar moge gy met Gosscalc Steynhuse umme spreken und wat gy dar an doen, dat es myn wylle wol. Item vorkopet dey sardoke, al woe gy sey geven, my es leyt dat gy also grot in schulden syn, mach ic raden, des sal neyn noet mer doen, ic wel leyver dey my wynnen dan gy und ic also grot in sorgen solen syn; Got helppe uns al umme met leyve hyr ut. My duncket, wy werden altyt in Lyflande
Briefwechsel Hildebrand Veckinchusen, Seite 57. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Briefwechsel_Hildebrand_Veckinchusen_057.jpg&oldid=- (Version vom 31.7.2018)
