Lyseke est to sunte Eynwolde, ic wel er underschet darumme vragen, ok schelt dyt 36 marc 10 sl., dat gy meynen dar my dey 18 marc Prusch tokomen, est dat sey my tokomen, so es ju summe recht, komen sey my to, so es myn summe recht. Na juower summe, so were ic ju in der selscop hyrvan schuldych 166 marc 4 sl. 2 ₰, na myner summe so unbreke der selscop 108 marc 14 sl. 2 ₰. Dyt schelt under uns beyden overal 57 marc 6 sl. Lub., also vorscreven es.
Item sy ic ju bysunder van Tyten und van Swartten wegen und vor dat Ypersch laken, dat wel ic gerne op my reken, summe dat ic ju propper sy 188 marc myn 6den Lub.
Item sy ic in dey selscop vor 24 marc Prusch vor 50 marc Lub. rekent.
Item dey 264½ marc van Boden van Stockam, staen by Johan van der Bruggen und by Hans van Mynden, dey mochte gy lange wol opnomen hebben, dar Reynolt Swartte seget men wolde myn schult mede betalen by Swartten tyden was dey dach noch nicht umme komen; und ic sande dar 5 balle sardoke, darmede myn schult betalt ward und ic scref ju, dat gy dat gelt opnemen, also scryve ic ju noch.
Item umme dat gelt van den terlync wandes, woe vele des es dat nemet op Johannes van Mynden, hey scref my hey wolde dey 30 ℔ gr. mede untrychten, doe scref ic eme dat gelt horde ju to, dat hey myn schult untrychtede van den sardoken und van mynen propper gude, des hevet hey my weder screven, hedde gy dat gelt opnomen, hey weldet wol betalt hebben, welle gy des nicht loven, ic wel ju gerne Hans van Mynden breyf senden, nemet desse 2 summen geldes op, komet dar schaden op, ic wel den schaden gerne oprychten und suomet hyr nicht mede.
Item gy scryven nu in juwen breyve und rekenscop, ic sy ju schuldych 36 marc 10 sl. van den 18 marc Pruschen, komen my dey 18 marc Prusch to, so wolde ic dar nicht reken ok solen dey dan in dey rekenscop nicht komen, ok en dorve gy dan nicht scryven, dat ic ju dey schuldych sy.
Item gy scryven ic sy ju und der selscop schuldych 1053 marc Lub. 5 sl., der scryvet weder af dey 128 marc, dey gy meynen, dat an der rekenscop unbreken, wand ic wet wol dey rekenscop sal recht syn met den 122 cronen. Scryvet ju weder to dey 264½ marc Lub. van Boden van Stockam wegen und kopet dey over. Item scryvet ju weder to dey 220 marc von deme naten terlync wandes, dey staen by Hans van Mynden; wat van deme terlync wandes komen es, dat kopet ok over.
Item dey 36 marc 10 sl. vor dey 18 marc Prusch scryvet my ok af est dat sey my tokomen to betalen, aldus es dey summe, dey ic van den 1053 marc 5 sl. weder afcryve an 4 porselen, summa 649 marc Lub. Nu moge gy reken, worvele ic ju schuldych sy, dat der selscop angeyt und ju propper angeyt.
Item nemet ummer dat gelt op Johan van der Bruoggen und op Hans van Mynden also gy eyrst kunnen, wand ic moet ummer 400 ofte 500 gulden op ju overkopen ut der myssen to Vrancvord, kunde ic dat ok met eynem cleynen schaden kern, dat ic also vele geldes op schaden neme in dey ander mysse, dat wolde ic gernne doen, op dat gy dat gelt in handen
: Briefwechsel Hildebrand Veckinchusen. Leipzig: S. Hirzel, 1921, Seite 52. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Briefwechsel_Hildebrand_Veckinchusen_052.jpg&oldid=- (Version vom 31.7.2018)
