selscop wegen hanttyrt hadde, doe blef ic der selscop overal schuldych 4 marc 9 sl. Lub. und ic hadde vor selyge Gosscalc van der Woesten den jungen utgeven vor allerleye dync also ic doe Tyten scref 43 marc und 2½ sl. Lub., dey nam ic doe darvan af und scref Tyten, dat hey also vele geldes van der reyntte, dey men den kyndern geven solde, weder in dey selscop legede und scref eme ok, doe dat my best duochte, dat men den kyndern alleweger er reyntte geve ut der selscop dat were alle jar 20 marc Ryges, dat hey dey al jar in Lyflande den kindern afgeve to reyntte, so dorfte elk syn gelt nicht bysunder utleggen, des duncket my nu dat Tyte scryvet, dat hey my torekent hevet vor dat gelt, dat ic vorworsten utgeven hadde 25 marc myn 1 sl. Ryges und hevet dey 25 marc vor uns to reyntte geven, dey bord ju my half weder to keren, des bord uns beyden vor 200 marc alle jar 10 marc to geven, dat es van 4 jar 40 marc, dat es ju 20 marc und my 20 marc, so blyve ic tachter van den 25 marc myn 1 sl. und to achter 5 marc myn 1 sl. Wan ic noch 1 sl. utgeve, so hebbe ic vor 5 jar vor 100 marc betalt, betalt gy ok 25 marc dar tegen vor 5 jar. Hebbe gy nu 5 ℔ gr. in der selscop leget, so bord ju noch 10 marc uttogeven vor dyt tokomende jar, dyt scryvet aldus Tyten men wan dey 5 jar umme syn so late men dey reyntte ut der selscop betalen, dat maket dey ryngeste rekenscop. Darmede es dyt slecht, men nu blyve ic der selscop schuldych dat gelt vor dey 25 marc myn 1 sl., dey ic tovorn afrekent hadde an Lub. gelde 43 marc und 3 sl. Lub. und 4 marc 9 sl. van eyner resten, summa 47 marc 12 sl. Lub., dey scryvet to unser selscop van myner wegen weder also vele sy ic ju mer schuldych dar mede moge gy dan reken woe dey selscop steyt. Ic wel nummer, dat dey selscop tachter gaen sy, ic hope ummer wy hebben wunnen und nicht vorlorn, overrekent dat also gy eyrst und best kunnen und ramet des besten al umme. Scryvet my aldync weder. Grotet alle vrunt. Ghescreven 5 dage vor sunte Bartolmeus dage 1410 jar.
Item leyve broder dey eyrst rekenscop, dey ic ju lest scref van Lubeke und van deme Sunde, dey sol recht syn met den 122 cronen, darumme menget dey rekenscop in desse lesten rekenscop nicht; ok dorve gy dey 122 cronen nergen anders inscryven, est dat gy in der rekenscop nicht vornemen, so wel ic sey ju gernne noch eyns scryven der rekenscop wel ic anders nicht maken my unbruck 540 marc 9 sl. 4 ₰, darvor hebbe gy my toscreven 85 ℔ gr. Darmede es dyt slecht und gy solen dyt recht vynden altyt to guder rekenscop. Ic bydde ju, dat gy desse rekenscop hyrop sluoten, wand ic hebbe dyt aldus screven to Lubeke und hyr.
Item also gy scryven van Lyseken rekenscop van deme dat sey upbord und utgeven hadde, dar vynd syk allewege wol, sey hevet untfangen 1273½ marc Lub., dey summe es recht; darop hevet sey weder utgeven 1164 marc 9 sl. 10 ₰ und gy meynen, sey hebbe men 1107 marc 3 sl. 10 ₰ utgeven. Dyt schelt 20½ marc 4 sl. an den 30 ℔ gr. to schaden syn komen est by uns vorsuomet so est mogelyc, dat ic den schaden hebbe.
: Briefwechsel Hildebrand Veckinchusen. Leipzig: S. Hirzel, 1921, Seite 51. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Briefwechsel_Hildebrand_Veckinchusen_051.jpg&oldid=- (Version vom 8.2.2018)
