hebbe, ghescreven 5 dage vor sunte Margreten dage.[1] Got hebbe lof, dat dey 2 tunnen werx overkomen syn, Got geve, dat Albrecht van Borcken beholden reyse overkome und nicht nomen sy, des were wol noet. Item sendet ummer Hoensteyne syn dync weder in guden schepen by sommerdage. Item ic scref ju lest und ok nu bynnen kord al antworde op breyve und begere op al dync antworde weder met den eyrsten und ic kan dey rekenscap nicht wol eynden und ju darop scryven, er ic myne rekenscap van Lubeke hebbe. Item dey 264 marc Lub. nemet op van bodengelde op Johan van der Bruoggen, ic sy eme nicht schuldych met alle scryvet eme, dat hey ju ½ Ypersch laken vorkope. Item dey 275 marc und das gelt van deme naten terlync wandes nemet al op Hans van Mynden also gy eyrst kunnen. Hey salt betalen, ic wolde dat gy dar lange opnomen hedden, sendet Scryver syn dync over met den eyrsten. Item doet wol und maket my over in dey Vrancvorder mysse 400 gulden ofte gy kunnen, est ok, dat gy nicht, so moet ic dat opnemen in der mysse, dat gy dar to Brugghe utgeven, wand ic sy et hyr schuldych an der myssen to betalen, men es my vele geldes to Lubeke schuldych, my wel neyman betalen, ic moet al dync utreyden also ic best kan, wand unse leyve here Got aldync beter maket. Got voget al dync to den besten al umme des behove ic wol, hedde myn dync und gud van Lubeke, ic geve nicht vele darumme, dat ic al myn dage hyr bleve, doch so meyne ic hyr 2 jar to blyven wand in dey Akenvard, ef Got wel, dar bynnen mochtet beter werden eynen wech.
Item Slyper hevet ju screven, dat gy neyn werk kopen solen und men sole ale werk to Lubeke kopen. Ic vruochte dat sole syk to Lubeke nicht al wol vynden; kunde gy guden kop kopen, so were gud, dat gy dar ok wat koften eyn del umme reyde und eyn del to borge ok eyn del Smollenssches und luschwerk, van al were gud koft, gy moten ok somals suolven des besten ramen met kopen. Ic meyne gy solen dar nu wol betern kop werk kopen dan to Lubeke. Uns solen ummer vele sardoke komen, dar mach ummer gelt van werden, dey selscap gelt uns mest, darumme mote gy sey sere mede vordern. Al hedde wy noch 1 tausend werk, des were al wol noet, solde wy dat werk allene to Venedyen in handen holden. Anders nicht, men beydet over my und grotet myn suster und alle vrunt vruntlyken. Ghescreven op sunte Maryen Magdelenen avent 1410 jar.
Item segget Tydeman Kastorppe, dat syn wyf hyr es und let en bydden, dat hey hyr kome met den eyrsten und doet Hynric opme Orde dessen breyf und es hey dar nicht, so beslutet en in juwen breyf und sendet eme to Lubeke und scryvet uns al tydynge van al umme. Item so wetet, dat ic gheleynt hebbe Hans Slyppen met Steynhuse 6 Rynssche gulden, dey nemet van eme und sendet my dey weder met den eyrsten. Ic behove alle dage gelt. Item ic hebbe hyr lovet vor eynen heyt Herman Schottelken van Ryge vor 32 gulden, vraget darumme ofte hey dey betalt hebbe, ic moet hyr alle
- ↑ 12. Juli.
: Briefwechsel Hildebrand Veckinchusen. Leipzig: S. Hirzel, 1921, Seite 39. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Briefwechsel_Hildebrand_Veckinchusen_039.jpg&oldid=- (Version vom 31.7.2018)
