des ic doch nicht lovet hadde, wand ic hadde en screven war sey gelt afmaket solden hebben, dat hebben sey vorsuomet, my duncket al truwe es in der werlt ute, Got betert, ic moet mede lyden.
Item dey 275 marc nemet op Hans van Mynden van Scryvers wegen. Item dey 200 marc van deme terlynge wandes moge gy ok opnemen tegen unser andern vrowen dage[1] to Lubeke to betalne, so sal my Hans van myner wegen opboren 350 marc van sardoke, dey solde men umme reyde vorkoft hebben, nu moeste men dey vor vorborgen; ok hope ic, my sole mer geldes inkomen to Lubeke van schulden und gude bynnen kord, wordet wol vorstaen, men my duncket al truowe es ute, nu ic dar nicht weder komen wel, sey scryven al den dach, ic sole dey borgerscap weder begern und komen dar weder, dyt doet Johan van der Bruoggen mest und gy wegen wol, solde ic den achtebreyf krygen vor ju und my, ic moste vor ju und my loven weder dey achte nicht to doene dat en were dat dey olde rat wes gunnen wolden, dat solde to en staen umme desser sacke wyllen und sole wy unse gud buten beholden so moet ic holden, dat ic vor uns und unse selscap lovet hebbe doch so hevet uns dey olde rat tyt ghegeven went paschen; ic meyne dey tyt werde uns wol lenger. Latet dey 440 gulden utgeven und segget Kulen, dat hey nicht van my segge und scryve van Slyper untfangen und nicht op my wand dat kome Slyper to.
(2. Blatt.) Item leyve broder, dey schade es to grot met den Tomasschen laken. Got geve uns wat weder werden mote, dat was ovel vorsuomet, dat men dat schep allene leyt segelen met den groten gude. Got geve ok dat unse 2 tunnen werk met leyve overkomen, dey op Gotlande wern und al gud, dat wy in Lyflande hebben, wel aldus ovel by der see staen, so gruowet my vor schaden, so wolde ic, dat wy al unse gud in der Venedyesschen selscap hedden. Boven al ramet des besten und sendet elkeme dat syne weder also gy eyrst kunnen an guder bekerynge also ju screven es.
Item so solen uns noch wol 60 vardele sardoke komen van Oeusborch, ef Got wel, und unser wulle es 13 sak to Venedyen komen und hope al unse gud sole mestlyc alreyde dar syn. Got gevet, dat were gud mer werx koft kunde gy wat to borge krygen, ok were dey lake gud vorkoft und werk weder mede koft und ok were der lake gud noch wat mer to Lubeke sand, sey sal dar mest gelden.
Item leyve broder, nemet dey Venedyessche selscap to hertten, also gy best kunnen, wand dar leget uns dye und vorderf ane mynesdels ummer und Peter moget sere, dat gy eme nicht by allen lopern, dey van Brugge ut to Venedyen wart teyn, al tydynge scryven van crude und wercke und van allerleye kopenscap und van allerleye nye tydynge und gude und my duncket, dat kunde ju nicht vele schaden na deme dat Peter eynen wyllen darinne hevet und ok mochtet uns grot profyt inbrengen und dat were Peter ok eyn wylle und grot ere, dat hey ummer by allen lopern breyve hedde lyk andern luden und gy heylden al dey loper wol to vunde met cleynen dyngen und rekend al breyve gelt und unkost der selscap und also doet ok Slyper hey geve noede ½ ₰ und hey rekend und scryvet dat al. Peter moget neyn dync
- ↑ 8. Septbr.
Wilhelm Stieda (Hrsg.): Briefwechsel Hildebrand Veckinchusen. Leipzig 1921, Seite 37. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Briefwechsel_Hildebrand_Veckinchusen_037.jpg&oldid=- (Version vom 31.7.2018)
