|
Wilhelm Stieda (Hrsg.): Briefwechsel Hildebrand Veckinchusen |
|
|
Broderlyke leyve vorscreven. Wetet, dat ic juwen breyf wol vornomen hebbe und ok Slypers breyf, des uns sere wundert, dat gy dey wulle afleggen hebben laten. Doet wol und sendet dey wuolle herward und al ander dync, dat gy koft hebben met den eyrsten dat gy kunnen, dat were wol 20 cronen werd, dat dey wulle nicht afgheleget were, so hedde wy dey lange van hyr vortan sand den Ryn op.
Item so gevet Gerd van Balgen ofte Arnd Wachedorppe 600 gulden, vor elken gulden 33 gr. und weset Arnde vruntlyk wand hey unse vrunt.
Item gevet Everd van deme Megen van Poltes wegen 400 gulden, vor elk gulden 33 gr. Item gevet Hyldebrand Wystraten ofte Clawes Balken 500 gulden, des sole gy eme geven 300 cronen, je 4 cronen vor 5 gulden und wat eme mer dan 300 cronen bord, dar sole gy eme vor elken gulden 33 grote geven. Item untfangen van Balken 500 gulden, dey Tydeman Rode eme dar daen hadde, aldus es dey summa van al, dat gy darvan den 4000 gulden utgeven solen met den 500 gulden van Balken summa 2000 gulden. Aldus beholde gy noch 2000 gulden, dar kopet uns al werk mede, gud schone werk und lusch werk und sendet dat herward sunder suomen op dat dar werk komen es, des gy kop kunen kopen, ic hope wy wellen al gud tuschen hyr und pynxsten noch wol to Venedyen ward schycken, wand wy hopen dey crych sole syk wol eyne tyt vortogen und wardet ok krych in dessen landen, so wolde wy doch wol gud van Mechelen to Straseborch to senden, dar vard al dage wagen tuoschen, dat es eyne gude strate gud henne to varne, dar dencket op ofte des noet worde, wand wy vruochten hyr al vor eynen groten orloge den Ryn op. Item also gy my in der rekenscap scryven, so duncket my som dync schelen an gude und an gelde, dat ic ju oversand hebbe; hebbe ic myne rekenscap hyr, so mochte ic ju dar scryven. Ic scref ju van deme Sunde rekenscap und al beschet van allen dyngen, es ju dey rekenscap worden, so scryvet dey ut und sendet my dey, so meyne ju al beschet wol to scryven. Ok also gy screven lest und ok nu scryven van deme gelde, dat met unser selscap mercke mercket was, dat meyne ic dat my dat bysunder horde; hordet ok in unse selscap, so were ic des doch tachter van der selscap wegen, ok duncket my, dat wy unse selscap und rekenscap nicht wol eyndygen und to eyner vasten rekenscap brengen, er wy rekenscap ut Lyflande und ut Prusen und van al umme hebben, dar wy noch gud hebben. Got geve beholden vard al umme; est dat gy eynych gud mer to der see ward senden ofte hanttyren wellen van unser beyder wegen, dat scryvet op eyne nye rekenscap und dat al olt dync bysunder eyrst slecchtet werde to eynen gantsen eynde und ramet des besten in allen dyngen und grotet alle vrunt und bydet over my. Ghescreven 11 dage na paschen 1410 jar.
Item so hebben my dey olde rat to boden, dat sey mynen broder und Hynric opme Orde und Tydeman Brekelvelde und Hans van Mynden und my vordegedingen wellen und wy alle und unse gud sole unghehyndert blyven, woe wy neyne borger to Lubeke syn, gy und ic syn ummer tovornin neyne borger, darumme dorve wy nicht sorgen. Ef Got wel, gy und ic ok,
Wilhelm Stieda (Hrsg.): Briefwechsel Hildebrand Veckinchusen. Leipzig 1921, Seite 33. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Briefwechsel_Hildebrand_Veckinchusen_033.jpg&oldid=- (Version vom 31.7.2018)
