Hir syn ingherekent, dat Peter to Venedyen kofft hevet 4000 van Johannes Mylys van Breslowe, 3000 und 150 van eynem manne van Prage, aldus es reyne worden es van den wercke dan van Lubeke unde van Brugge komen es 200 000 unde 66 000 myn 31 werx.
Leyve vrunde, Hynric unde Hyldebrand, wy hebben grot eventuor staen unde nicht vele wunnen an dessen wercke, also gy wol overreken mogen. Hedde men dyt werk umme 80 ducaten to borge vorkoft, dat solde uns wol 2000 ducaten batet hebben unde of es an deme gude, dat hey uns butet hevet, neyn grot profyt wesen. Dat moet hyrnest anders handelt syn. Hyrnest sal ju al rekenscop van Lubeke komen. Darna mach men dan des besten ramen. Ghescreven 14 dage na Paschen 1409 jar.
21. Heinrich Slyper in Köln an Heinrich opme Orde und Hildebrand Veckcinchusen in Brügge. – 1409 Juli 3.
- Rev. St.-A. Orig. Adr.: Hinrik opme Orde unde Hildebrant Vockinchusen to Bruegge.
Vrentlike grote vorescreven. Hinrik unde Hildebrant ju welt weten, dat se my dese rekenschop unde dessen bref hirby es van Lubeke santen unde screven, dat ik es ju kopie senden solde; nue sin dit de kopien.
Item so wetet, dat ik en mynen sin und antworde abrede hirop ghescreven hebbe, dat es, dat my wuondert, dat se Hannes Vranke vor eventur bate gherekent hebben, wante hedde de selschop vorloren, he en hedde nicht enen ₰ ghehat den schaden mede to belegghen.
Vort so hebben se Peter vor 1000 mark winninghe gherekent unde ik en wuoste nicht dan van 700 marken, de he in der selscop hadde unde wy solen unse gelt vor sunte Jakoppen daghe ingheleget hebben unde he sal vort inlegghen, wan he et hevet unde sal een viften deel an der selscop hebben allene alse ghi in erren breven hirby wol vornemet unde sal groet vordel hebben unde sal grote kost driven unde grote staet op unse selscop unde sal alle sine maghebort voren to Venedien an desse rese op unse kost.
Item Hinrik unde Hildebrand, vrende, aldus grot vordel en doen de Norrenbergher nicht noch ok unse borgher, de de selve rese varen. Dit scrive ik ju unde ik hebbe et en ok to Lubeke uterlike ghescreven unde ik wel et Peter ok selver seghen, wan he herkomet.
Item ik hebbe en ghescreven, ik hedde lever dat 2 man 1 viften deel hedden, de uns in scaden mochten staen dan 1 allene de uns nicht enen ₰ en kan vorlegghen, dem wy vorlegghen moten, mer boven al, wat jue allen guoet duenket, dat es my ok leef. Item so en es Sivert nicht hir, ik mene et ensole eme ok nicht al behaghen.
Item Hildebrant, so hebbe ik juowen bref wol vornomen, (de) ghescreven war op den 26sten dach in junneijus, ik wel met allen dinghen
Wilhelm Stieda (Hrsg.): Briefwechsel Hildebrand Veckinchusen. S. Hirzel, Leipzig 1921, Seite 29. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Briefwechsel_Hildebrand_Veckinchusen_029.jpg&oldid=- (Version vom 31.7.2018)
