4000 mark Lub. Item Peter Karbouwe unde Hinrik Sliper ok 4000 mark Lub.
Item aldus were dit gelt an 5 deel ghedeelt. Unde were welk, de met sinem vrende nicht also vele inlegghen en wolde, de vindet dat met eme anderen wol, de wat mede in sin part legghen off men rekene junghe ghesellen mede in er part. Item wat jungher ghesellen wy mer hebben, de er gelt utgheleget hebben unde nicht in dese 5 part gherekent en were off namals bi uns quemen, de solen op der gheselscop kost winnen na penninktale gheliek uns allen und wy menen op ju behaghen unde wellen van desem daghe vort alle eventur staen to winnen unde to vorlese op dese vorscreven 20 000 mark Lub. Item by alsulken vurworden dat men alle guet, war et es, rekenen sal na redelichet op desen dach vort op een summum geldes unde dat to delen na penninktalle alle den ghenen, de aldus langhe er gelt in der gheselscop ghehat hebben. Wan dat dan ghescheen es, so sal elk op er vifte deel so vele utlegghen, dat elker parteen 4000 mark Lub. vul utgheleget werden. Item, dat Got vorbede, dat of ennich guet vorlorren worde van desem daghe vort, et wer in wat maten et wer, dat to deser gheselscop horde, dat in wat maten dat scheen mochte, dat sal op de 20 000 mark Lub. malkem na penniktalle vorloren sin. Got gheve beholden rese amen.
Item so es dit unse guetdunken, dat wy des besten ramen, wanner wy ener rekenscop holden, dat wy dan overseen, we mest arbedes heet ghehat, dat wy deme mest vordels doen. Ok so menet Peter, he en welle sunder vordel to Venedien nicht ligghen also dat ok wol moghelik es. Item so dunket uns guet sin, dat wy breve maken op dese selscop wo se vortstaen sal unde dat elk mechtich si to done unde to laten in elker stede, war elk legghet, dat wy eme al bystendieh sin unde schadeloes holden van alle deme, dat he in dat beste doet, dat wi dat gheliek staen na penninktalle to winnen unde to vorluese, op dat elkeliek vorwart si to winnen unde to vorluese, et si by leven of by sterven; want wy sin al doetlik. Item Hinrik, leve vrent, wy hebben overdacht unde oversproken alse ume de sark, de ghi herghesant hebben. Uns dunket best, dat ghi dese sarke overgheven sollen in unse selscop, wante wy hebben se op unser selscop eventur nu vortghesant unde menen, wy wellen ju vor juwe kost unde arbeet doen, wan wy to pinxsten by ju komen, dat wy menen, ju sole wol ghenoghen. Wante et en wel sik anders nicht vinden unde welle ghi hirnest over meer, ju sal geldes ghenoech werden. Ok so mene wy under uns dreen, of Got wel, van nu to sunte Jakoppes daghe[1] over 1 jaer over mer to teende. Wante Peter ment, uns alle dink to bestellen, dat wy in 12 weken weder to Venedien sin. Unde he wel selver mede. Unde welle ghi darop beyden, dat dunket uns guet sin. Wy wellen teghen de tit geldes dar ghenoech hebben, wanne et es beter teghen den winter over meer to varen dan teghen den sommer. Item leve vrende, et moste vorwisset sin de wessel, so men hogest unde best konde. Hirume vraghet
- ↑ 25. Juli.
Briefwechsel Hildebrand Veckinchusen, Seite 24. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Briefwechsel_Hildebrand_Veckinchusen_024.jpg&oldid=- (Version vom 31.7.2018)
