10. Sinus rectus, ein rechter sinus, ist der halbe theil von der chorda deß gedoppelten arcûs. Als in nechster figur der sinus rectus deß arcûs BC. 50°. ist die linea BE. Dann gemelter arcus BC. gedoppelt / ist der arcus BCD. dessen chorda oder vndergezogene lini ist BED. deren halber theil ist BE. welcher halbe theil dann / wie gemelt / der sinus rectus deß vorhabenden arcus BC. ist. Oder / noch deutlicher zusagen / sinus rectus ist ein perpendicularis linea, das ist / ein waglini / so wagrecht / winckelrecht oder bleyrecht von dem einen ende deß vorhabenden arcûs herab fallt auff den diameter / so auß dem andern ende desselben arcûs gezogen wirdt. Als in vorigem Exempel der sinus BE. fallt wagrecht auff den diameter GC. Das fundament diser beschreibung steckt in der 3. prop. deß 3. Buchs Euclidis.
11. Sinus versus, ein verkerter sinus, ist ein segmentum oder stuck deß diameters / zwischen dem sinu recto vnd der circumferentz eingeschlossen. Als / sinus versus deß arcûs BC. ist EC. wirdt sonsten sagitta oder ein pfeil genennet / deme er sich der figur nach vergleicht.
12. Sinus complementi ist der jenige sinus rectus, welcher gebürt dem complemento deß vorhabenden arcûs. Als BK. ist deß auffgebenen arcûs BC. sinus complementi. Dann arcus BF. ist das complementum deß arcûs BC. wie droben in der 5. definition zusehen: welchem complemento gebürt gedachter sinus rectus BK. Hiebey ist wol zumercken / das der sinus complementi allezeit gleich seye dem segmento oder stuck deß diameters / welches da ist zwischen dem centro vnd sinu recto
Matthias Bernegger: Manuale Mathematicum. Straßburg: Paul Ledertz, 1619, Seite 19. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Bernegger_Manuale_019.jpg&oldid=- (Version vom 31.7.2018)
