Rvment den weg der minne lieben frowen

Rvment den weg der minne lieben frowen·
vnd lant mich ir vil reinen lib an sehen·
den moͤht ein keiser wol mit eren schowen·
des hoͤre ich ir die meiste menge iehen·
des mv̊s min herze in hohen luften stigen·
ir lob ir ere wil ich niht verswigen·
swa si wont dem lande mv̊s ich nigen·

Frowe minne wis min botte alleine·
sage der lieben die ich von herzen minne·
si ist die ich mit ganzen trúwen meine·
swie si mir benimt so gar die sinne·
si mag mir wol hohe froͤide machen·
wil ir roter munt mir lieplich lachen·
seht so mv̊s mir alles truren swachen·

Ich bin verwunt von zweier hande leide·
merkent ob das froͤide mir vertribe·
es valwent liehte blůmen vf der heide·
so lide ich not von einen reinen wibe·
dú mag mich wol heilen vnd krenken·
wolde aber sich dú liebe bas bedenken·
so weis ich mir mvͤste sorge entwenken·