Riche wât hat an geleit (Mit aufgelösten Abbreviaturen)

Riche wât hat an geleit·
walt anger vnd dv́ heide breit·
der svmer gap dv́ selben kleit·
abrelle mas der meie sneit·
wêher wât wart nie bereit·
sit der werde svmer gît·
dvrch rehte milte dv́ an im lit·
svs riche gabe svnder niht·
des singent vogel wider striht·
sin lop in den landen wît·
dar zú pfifet suͤze gar·
manig nahtegal dar dar·
swer es rehte nimet war·
so sprichet al der blůmen schar·
als an einem danze var·

Welt ir schǒwen richer wât·
noch bas gesnitten vnd genât·
dv́ rehte gar ze wnsche an stât·
ich wils gesagen est kein rât·
seht min herze liep si hât·
wissent das ir mantel sî·
vro ere vnd tv̊t si schanden vrî·
dv́ ander wât stêt wol der bî·
dast minnekliche schoͤne ahî·
si ist der wnne ein blvͤndes zwî
riche selde ân allen has·
gab dis kleit dv́ zuht es mâs·
kv́sche sneit bas vnd bas·
dv́ reinekeit dvrch nâte das·
tvgende nihtes dran vergas·

Ich bin nakent vnd blôs·
an froͤide vnd ist min truren grôs·
mir gent die súften mangen stos·
nah ir bi der mich nie verdrôs·
iamer ist min hv̂s genôs·
trût nv sten ich schamelich·
den mantel ort swenke vmbe mich·
ein vmbevahen das meine ich·
fúr tvsent zoͤbel liep nv sprich·
also willich kleiden dich·
Hei min liehter meien schin·
mis dis kleit mv́ges gesin·
volleklich vnd snide phin·
stelle wol das mv̊der min·
aller tvgende meisterin·