Rehter liebe vz ſtetem mv̊te

Rehter liebe vz ſtetem mv̊te·
d̾ han ich da her gepflegen·
die v̾ſtet mā mir zvngůte·
nv wil ich mich ir bewegen·
ich wil vꝛi vō hinnē ſin·
ſwes ich ſi der ſi ǒch min·
ſit mich gvͤte nien envꝛomet·
wc ob mir vngvͤte bas zegv̊te kvmet·

We dc ich der ſvͤzen m̾e·
vō der w̾den ſol gedagen·
dú mich duhtē ir geb̾e·
dc mv̊s ich doch iemer klagē·
nv wc clage ich ſit ſi mir·
niht engan ich gvnde ir·
rehte als ich mir ſelbē gan·
deſt niht gůt ſol ich beſwichē ſin dar an·

Was bedoꝛft ich lang̾ ſtete·
dien die mir niht ſtete ſint·
ſwer dc ſo v̾gebne tete·
ſeht d̾ duhte mich eī kint·
als ich han da her getan·
wā wil mich zetoꝛē han·
ſw̾ dc ſi der huͤte ſich·
deſt min rat ê dc er rehte erzúrne mich·

Ich wil in dē vierdē liede·
an dē ende ir mv̊t erſpehen·
der mirs noh nah willē ſchiede·
dc lieze ich zem fúnftē ſehē·
ich bin beidenthalp bereit·
al dar nach dc los geſeit·
ſeit es wol ſo ſinge ich bas·
miſſeſeit es mir ich ſinge ǒch dc·

Ich mv̊s vō v̾dienter ſchulde·
mich d̾ liebē ſchuldig ſagē·
des wil ich g̾ne vmb ir hulde·
ſchvldekliche bv̊ze tragē·
min vnfůge vuͤget wol·
dc mich niema troͤſtē ſol·
wan ein troſt da dinge ich an·
dc ſich wibes gvͤte niht gelichē kan·