Owe voglin doͤne (Mit aufgelösten Abbreviaturen)

Owe voglin doͤne·
owe manger schoͤne·
die vil schone wib·
dike ê giengen schowen·
vf heide vnd in owen·
manig zarter lib·
in lichtem kleide·
loslich dur dc gras·
ir schoͤne vnd der heide
lúchtent· zemene bas beide·
was da wunnen was·

Des wart da von inne·
froͤit vnd wilder sinne·
manig iunger man·
die mit mangem blike·
moͤchtent sehen dike·
frowe vf den plan·
ia was das húre·
des mag nu nit sin·
winter bringet sin stúre·
des sint froͤide túre·
vns vnd vogelsin·

JA klage ich noch mere·
dc min frowe here·
nie gewag min not·
vnd ich doch so harte·
ir genaden warte·
bis vf minen tot·
vnd neme dú schone·
mir noch sende arbeit·
so wurde mit ir lone·
edeles heiles krone·
vf min hǒbt bereit·