Owe mins herzen das twinget dv́ svͤsse

Owe mins herzen das twinget dv́ svͤsse·
wer mag gebvͤsse·
so gar senden pin·
neina min zertel la dich noch erbarmen·
mich senden armen·
tů mir helfe schin·
Mir ist verswunden·
gar helfe vnd trost
ich bin mit blicken so vaste gebunden·
al solker wunden·
wart ich noch nie erlost·

Was solt ein wip also zart· si entwunge·
das man doch sunge
vil ir werdekeit·
was solt ein munt also rot er lache·
da von doch swache·
vil̄ sorge vnd leit·
was solden wangen·
so gar rose var·
sv́ hetten frúnde denn můt so bevangen·
das in erlangen
doch můst aber dar·

Swa gnade wont secht da sol man si sůchen·
wil sis gerůchen·
der wart ich al da·
man sol die schoͤn nicht loben ane guͤte·
got si behuͤte·
die sint ir vil na·
muͤst ich ir kv́nde·
noch gar minen můt·
so enwart vf erde nie groͤslicher sv́nde·
das liep gen stv́nde·
nicht frúntlich tůt·