Owe des scheidens des er tet

Owe des scheidens des er tet·
von mir do er mich vil senende lie·
wol aber mich der lieben bet·
vnd des weinens des er do begie·
do er mich truren lâssen bat
vnd hies mich in froͤiden sin·
von sinen trehenen wart ich nas
vnd erkv́lte ê doch das herze min·

Der dur sine vnseligheit·
iemer arges iht von ir gesage·
dem mvͤsse alles wesen leit·
swas er minne· vnd dc im wol behage·
ich flůche in vnd schadet in niht·
dvr die ich ir mv̊s froͤmde sin·
als aber si min ǒge an siht·
so taget es in dem herzen min·

Owe was wissent si einem man·
der nie frǒwen leit arg gesprach·
vnd in aller eren gan·
dur dc mvͤt mich sin vngemach·
dc si in gruͤssent vber al·
vnd zv̊ im redende gant·
vnd in doch als einen bal·
mit boͤsen worden vmbe slant·