Nv wil der ſum̾ hinnen

Nv wil der ſum̾ hinnen·
owe daſt mir leit·
man ſach in ſinem graſe dike ſchone frowen gan·
der winter bꝛingit vns innen·
grôſſer trurikeit·
vn̄ ǒch dike kleine vogel wilde das ſir ſang wen lan·
da bi iſt er ǒch bi ſenden ſoꝛgen ſchade·
ſi weren an in doch vil zeſwere·
ich můs iem̾ ligin vnd̾ glúkes rade·
mirn helfe vf min frowe ſeldebere·
ſi iſt gar wandels lere·
dauō bin ich ir·
owe wenne ſol vō ir genaden komen ir troſt zemir·

Wer moͤchte mir gelǒben·
wie mir ſenden iſt·
ſwenne ich ſi ſihe ſo ſchon gebaren vn̄ ſo wol geſtalt·
ir wunne macht mich tǒben·
das mir ſinne bꝛiſt·
vn̄ bꝛīne ǒch in d̾ mīne vúre wilēt wirde ich kalt·
alſo wandel ich mich da von recht̾ not·
wan mich iam̾t nach ir alſe harte·
ir wengel vn ir munt ſint ſo roſen rot·
da bi lachet ſi ſo rechte zarte·
ſi iſt ǒch rechter arte·
ach wie iſt ſi ſo gůt·
got hat ir truten ſtolzen lib voꝛ arge gar behůt·

Enkein ding mag ſo gůt ſin·
man vindet wol daran·
das man ſpꝛeche en wer das ſo were es volkomen gar·
wan dú ſchone frowe min·
dú iſt wandels erlan·
ſi iſt kúſch mit woꝛten vn̄ mit w̾ken ſo iſt ſi valſches bar·
eſt nit můtwille das mir nach ir iſt ſo we·
mich erlat ſin nicht dú ſtarke minne·
ir kel vn̄ ir hende ſint wis recht als d̾ ſne·
vn̄ ſtet ſo lieblich ir ir kinne·
uil wol ſtet ǒch ir tinne·
vn̄ ir ǒgen clar·
als ich ſi han gelobt· dc iſt ane allen zwivel war·