Nv klage ich der kleinen vogellin swere

Nv klage ich der kleinen vogellin swere·
nv clage ich dv́ heide ist blv̊men lere·
so klage ich dc mir dv́ wnnekliche seldebere·
hat berǒbet mich der froͤiden sinne·
sich da bist dv schvldig an trvt minne·
sit dv weist dc ich so gar in diner glvͤte brinne·
dc mag mir din truͤteleht̾ lip mit liebe bvͤssen·
vnd ir roter mvnt der sol mich grvͤssen·
tv̊nt dv́ zwei des niht so klage ichs doch der reinen svͤssen·

Si mag mir wol minen kvmber wenden·
vnd ir minnekliche helfe senden·
owe minne wenne wilt dv troͤsten mich vil senden·
wenne wilt dv mir min truren swachen·
wenne wiltv svͤsse fruͤde machen·
also dc ir roter mvnt mir lieplich wolde lachen·
truͤtelehter lip dv la mich liebe froͤide vinden·
dv maht mich von sender not enbinden·
wilt dv herzen trut so mag mir sendes leit verswinden·

Nv was hilfet swas ich clage der heren·
sin wil mir enheine froͤide meren·
svͤsse minne maht dv doh die minneklichen leren·
dc si fvͤge das mir leit entwiche·
sich so wirde ich noh an froͤiden riche·
tv̊t si dc so wirde ich fro dv́ svͤsse minnekliche·
also dc mir wrde ein grv̊s von ir vil rotem mvnde·
vnd ir kvs mis herzen not enbvnde·
do ich si von erst an sach dc was ein svͤssú stvnde·