Nv ist es an ein ende komen dar nach ie min herze ranc

Nv ist es an ein ende komen dar nach ie min herze ranc·
das mich ein edelú frǒwe hat genomen in ir getwanc·
der bin ich worden vndertan·
als dc schif den stúrman·
swanne der wag sin únde also gar gelâssen hat·
so hoh owi
si benemet mir mange wilde tat·

Ia hoͤre ich vil der tvgende sagen von eime ritter gůt·
der ist mir ane mâsse komen in minen steten mv̊t·
dc sin zekeiner zit min lip·
mag vergessen redte ein wib·
nv mv̊s ich alder werlte haben dvr sinen willen rât·
so hoh owi
wol ime wie schone ir das gedienet hat·

Wie moͤhte mir min herze werden iemer rehte frůt·
dc mir ein edelú frǒͤwe also vil zeleide tůt·
der ich vil gedientet han·
als ir wille wc getan·
nv wil si gedenken niht der mangen sorgen min·
so ho owi
sol ich ir lange froͤmde sin·